काठमाडौं । नेपाल कम्युनिस्ट पार्टी (नेकपा)की नेतृ पम्फा भुसालले लोकसेवा आयोगको विज्ञापन अघि बढाउन सर्वोच्च अदालतले दिएको आदेशलाई ‘अर्को १७ साल’को संज्ञा दिएकी छिन् ।
बुधबार राज्य व्यवस्था समितिको बैठकमा उनले उक्त विज्ञापनसम्बन्धी रीटमा सर्वोच्चले दिएको आदेशलाई प्रतिगमनको पराकाष्टा भएको आरोप लगाइन् ।
‘अदालतजति प्रतिगामी कोही पनि छैन, लोकसेवा आयोगको विज्ञापन अगाडि बढाउन दिनु अर्को १७ साल हो’ पूर्व सामान्य प्रशासनमन्त्रीसमेत रहेकी भुसालले भनिन् ।
लोकसेवा आयोगले स्थानीय तहका विभिन्न ९ हजार १ सय पदमा विज्ञापन आह्वान गर्दा समावेशीतालाई ख्याल नगरेको भन्दै राज्य व्यवस्था समितिले त्यसलाई रोक्न निर्देशन दिएको थियो । तर यो विवादमा सर्वोच्चले विज्ञापन रोक्न आदेश दिन अस्वीकार गरेको थियो ।
