-द्रोण अधिकारी
भद्रपुर । झापा कारागार सुरक्षर्थ खटिएका प्रहरी पदीय आचरण विपरित महिला हिंसामा लाग्ने गरेको पाइएको छ । कैदीबन्दी भेटन आउने महिलाहरूलाई कारागारमा सुरक्षार्थ खटिएका प्रहरीले यौनिक हिंसात्मक नजरले हेरेर पीडा थप्ने काम गरेको पाइएको हो । चन्द्रगढी स्थित झापा कारागारमा थुनुवा तथा कैद भूक्तान गरिरहेका व्यक्तिलाई भेट्न आउने आफन्त युवती तथा पत्नीमाथि गिद्धे नजरले हेर्ने गरेको पीडित महिलाहरूको आरोप छ ।
कारागारमा खटिएका सइ नरेश आचार्यले आवत जावत गर्ने महिलाहरुलाइ रोकेर अनेकथरी विवरण सोधेर सम्पर्क नम्बर समेत लिने गरेको पीडित महिलाहरूले आरोप लगाउने गरेका छन् । कारागारको मूख्य प्रवेशद्वारमा नाम दर्ता गराउदा मोवाइल नम्बर र नाम समेत उल्लेख गर्ने नियम रहेको छ । सोही विवरणको आधारमा आफन्तलाइ भेटेर वाहिर निस्किएका महिलालाई बारम्बार फोन गरेर अनावश्यक कुरा गरी मानसिक पीडा दिने गरेको पीडित महिलाहरूले गुनासो गरेका छन् । जेलमा श्रीमान छ, भन्दैमा हामीमाथि प्रहरीको गलत नजर लगाउने, संवेदनशील अङ्गमा हेर्ने जस्ता व्यवहार प्रहरीले गरेको महिलाहरुको गुनासो छ ।
जेलमा रहेका श्रीमानलाई खाना लगायत अन्य कानूनले दिने सामग्री लिएर जादा गुणस्तरीय सामान प्रहरीले झिक्ने गरेको महिलाहरुको गुनासो छ । फेरि आउँदा मेरो लागि सामान लिएर आउनु भन्दै माग गरेको भेटन आउने आफन्तहरूको भनाइ छ । सुरू–सुरूमा राम्रै कुराहरू सोध्नु हून्थ्यो, म पनि भन्थे, श्रीमानलाई अप्ठ्यारो परेमा सहयोग गर्दिनु है जस्ता गफ हुन्थे, पछि त सइ सापले उल्टै आफुलाई गलत नजरले हेर्न थालेको पीडित भएकी एक महिलाको भनाइ छ । केही दिन अघि हवल्दार यादव मार्फत एनसेल नम्बरबाट कल गर्न लगाएर सइ सापले तपाइसँग भेटेर विर्तामोड डुल्न जाउँ भनेको उनको भनाइ छ । त्यस्तो कुरा गरेपछि आइन्दादेखि मलाइ फोन नगर्नु भनेर हवल्दारलाई सम्झाएको ती महिलाले बताइन् । सइले जिस्क्याएको कुरा श्रीमानलाई पनि जानकारी गराएको महिलाले सुनाइन् । हवल्दारको कुरा सइलाई जानकारी गराउदा समेत वास्ता नगरेको महिलाहरुको भनाइ छ ।
सइले नानी कती छन् ?। सिजर हो कि नर्मल ? तपाइसँग गफ गर्न मन लागिरहन्छ भन्ने गरेको अर्की महिलाले बताइन् । यो कुरा बाहिर आएमा जे सुकै पनि हुनसक्ने भन्दै आतङ्कित बनाएको समेत भनाइ छ । सइ कै कारण कारागारमा आफन्त भेट्न जान पनि तनाव भएको पिडित महिलाहरू भनाइ छ । कारागारका सुरक्षाकर्मीको कार्यशैली र व्यवहारले महिलामाथि डर र त्रास छाएको जनाइएको छ । सइको कार्यशैली प्रति दुवै तर्फका चौकीदार, जेलरलाई समेत जानकारी छ । तर, कारागार प्रशासनले सुरक्षाकर्मीको आचरण सुधार्न प्रयास नगरेको पीडितहरू बताउने गर्छन् ।
महिलाहरुले लगाएको आरोप गलत भएको सइ आर्चायले जानकारी दिए । कुनै गुनासो भए प्रहरीसँग भन्नु पर्नेमा वाहिर गएर भनेको कुरामा कुनै सत्यता नभएको उनको भनाइ छ । कारागारमा प्रहरीले गरेको अभद्र कार्यशैलीका बारेमा कुनै जानकारी नआएको जिल्लाका डिएसपी महेन्द्रकुमार श्रेष्ठले बताए ।
