काठमाडौं । साझा यातायातले रात्रिकालीन सेवा सुरु गरेको छ । पहिलो चरणमा साझाका तीनवटा बसले राति १० बजेसम्म सेवा दिन थालेका हुन् । कलंकी–कालिमाटी हुँदै लगनखेल, नयाँ बसपार्कबाट लगनखेल र एयरपोर्ट चाबहिल नयाँ बसपार्कको रुटमा साझाले रात्रिकालीन सेवा दिइरहेको छ ।
गत बुधबारदेखि रात्रिकालीन सेवा सुरु भएको साझा यातायातका कार्यकारी सञ्चालक भूषण तुलाधरले जानकारी दिए । ‘यसअघि साझा राति ९ बजेसम्म सञ्चालन भइरहेका थिए ।
अहिले तीनवटा बस थप गरी एक घन्टा ढिलोसम्म सञ्चालन गर्न थालेका छौँ,’ उनले भने, ‘यो ट्रायलका रूपमा सञ्चालन गरेका हौँ । केही समयपछि अन्य बसले पनि १० बजेसम्म सेवा दिनेछन् ।’ साझा यातायातसँग हाल ७१ वटा बस छन् । तीमध्ये चारवटा बस भने लामो दूरीमा सञ्चालन हुन्छन् । बाँकी बस काठमाडौं उपत्यकामा सञ्चालित छन् ।
अन्य यातायात कम्पनीसँग छलफल हुँदै
काठमाडौं महागनरपालिकाले सवारी तथा यातायात व्यवस्थापन ऐनअनुसार साउनभित्रै रात्रिकालीन बस सञ्चालन गर्न अन्य यातायात कम्पनीसँग छलफल गर्ने भएको छ । ‘ऐन राजपत्रमा प्रकाशित भएर आइसकेको छ । अब कार्यान्वयनका लागि अनुगमन समिति बनाउने तयारीमा छौँ,’ महानगरका सूचना अधिकारी वसन्त आचार्यले भने, ‘रात्रिकालीन सेवा सञ्चालनका लागि यातायात व्यवसायी र सरोकारवालासँग छलफल गर्नेछौँ ।’ महानगरले सार्वजनिक सवारीमा कोचाकोच गरेर यात्रु राख्न नदिने भएको समाचार नयाँ पत्रिका दैनिकमा प्रकाशित छ ।
