भोजपुर । अविरल वर्षातसँगै आएको पहिरोमा परी भोजपुरमा दुई जना घाइते भएका छन्। घाइते हुनेमा भोजपुर नगरपालिका ११, आम्तेककी ६६ वर्षीया रामकुमारी राई र रामप्रसाद राई गाउँपालिका ७, बासिखोराकी ३५ वर्षीया प्रेमकुमारी राई रहेका छन् ।
जिल्ला प्रहरी कार्यालय भोजपुरका इन्सपेक्टर पाण्डव राजवंशीका अनुसार प्रेमकुमारीलाई घाँस काट्ने क्रममा र आम्तेककी रामकुमारीको घरकै आँगनमा पहिरोसँगै झरेको ढुंगाले लागेको हो ।
पहिरोले प्रेमकुमारीको कम्मर र घुँडा, रामकुमारीको दायाँ हातमा चोट लागेको प्रहरीको भनाइ छ। दुवैजना प्राथमिक उपचारपछि घर फर्किसकेका छन्।
