काठमाडौं । खुलामञ्चमा अवैध सटर बनाउन स्वीकृति दिने काठमाडौं महानगरपालिकाका तत्कालीन प्रशासन शाखाका अधिकृत ज्ञानेन्द्र कार्कीलाई कारबाहीस्वरूप संघीय मामिला तथा सामान्य प्रशासन मन्त्रालयमा तानिएको छ । मंगलबारको निर्णयपछि मन्त्रालयले कार्कीलाई काजमा खटिन निर्देशन दिएको छ ।
०७३ को वैशाखमा कार्कीले भ्युटावर निर्माण कम्पनी जलेश्वर स्वच्छन्द विकोई बिल्डर्सका मालिक मनोज भेटवाललाई खुलामञ्चमा सटर बनाउन स्वीकृति दिएका थिए । त्यसवेला महानगरपालिकाका कार्यकारी अधिकृत अध्यागमन विभागका महानिर्देशक सह–सचिव ईश्वरराज पौडेल थिए ।
कार्कीकै स्वीकृतिपछि भेटवालले खुलामञ्चमा सटर बनाई व्यापारिक प्रयोजनमा लगाएका थिए । सटर बनाएपछि भेटवालले साना लगानीका व्यापारीसँग सलामी रकमसहित झन्डै आठ करोड रुपैयाँ असुलेका थिए । जनदबाबपछि खुलामञ्चमा बनाइएका सटर भत्काइएका छन् ।, समाचार नयाँ पत्रिका दैनिकमा प्रकाशित छ ।
