काठमाडौं । सरकारी स्वामित्वको दुग्ध विकास संस्थान (डीडीसी) ले २०७५/७६ मा स्थानीय दुग्ध उत्पादक कृषकबाट उत्पादित ४ करोड २ लाख ३५ हजार लिटर कच्चा दूध खरिद गरेको छ। यो गत चैतसम्मको तथ्यांक हो। यसबापत उसले कृषकलाई दुई अर्ब ७१ करोड ४९ लाख ३३ हजार रुपैयाँ भुक्तानी दिएको छ।
२०७४/७५ मा कुल कच्चा दूध संकलन गरी जम्मा कृषक भुक्तानी रकम २ अर्ब ७१ करोड ४९ लाख ३३ हजार रुपैयाँ भएको थियो। विराटनगरस्थित संस्थानको धुलो दूध कारखानाको ३ मेट्रिक टन प्रतिदिनको क्षमतालाई दोब्वर गरी डेरी ह्वाइटनरसमेत उत्पादन गर्ने गरी कारखाना पूर्ण क्षमतामा सञ्चालनमा ल्याएको छ। प्रदेश नं १ सरकारको आर्थिक सहयोगबाट सोही कारखानामा ब्वाइलर तथा आईस बैंक खरीद प्रकृया बढेको तथा प्रदेश ५ सरकारको ५० प्रतिशत अनुदानमा २ थान ९ हजार लिटर क्षमताको रोड मिल्क ट्यांकर खरिद भएको छ।
संस्थानको आन्तरिक स्रोत परिचालनबाट क्रमिक रूपमा पुराना मेसिनरी सामानको विस्थापनबाट लागत घटाउने तथा क्षमता अभिवृद्धि गरेको छ। यो पाँचवटा प्रदेशमा विस्तार भएको छ। संस्थानका वितरण आयोजना प्रदेश नम्बर १, प्रदेश नम्बर २, प्रदेश नम्बर ३, प्रदेश नम्बर ५ र सुदुरपश्चिम प्रदेशमा विस्तार भएको हो।
२००९ सालमा स्वीस सरकारको सहयोगबाट निर्मित लाङटाङ चिज उत्पादन कारखाना भूकम्पबाट पूर्णरूपमा क्षतिग्रस्त भएकोमा स्वीस सरकारकै सहयोगमा उक्त कारखानाको पुनर्निर्माण कार्य सम्पन्न भएको छ। रसुवा जिल्लाको चिलिमे तातोपानी तथा थुमनमा नयाँ याक चिज उत्पादन कारखाना स्थापना गरी उत्पादन कार्य सुरु गरेको समाचार अन्नपुर्ण पोष्ट दैनिकमा प्रकाशित छ ।
