काठमाडौं । भारत प्रशासित कस्मिरमा केही दिनयता सन्त्रास फैलिएको छ। सरकारले कस्मिर पुगेका पर्यटक र अमरनाथ जान लागेका तीर्थयात्रीलाई सूचना (एडभाइजरी) जारी गर्दै जतिसक्दो चाँडो कस्मिर छोड्न भनेको छ।
अधिकारीहरूले सुरक्षासम्बन्धी चेतावनी जारी गरेपछि हजारौँको सङ्ख्यामा हिन्दू तीर्थयात्री र पर्यटकले भारत प्रशासित कश्मीर छाडिरहेका छन् ।अधिकारीहरूले पाकिस्तानद्वारा संरक्षित आतङ्कवादीहरूुले वर्षको एउटा समयमा मात्र जान पाइने प्रसिद्ध तीर्थस्थल अमरनाथतिर गइरहेका तीर्थयात्रीहरूलाई आक्रमण गर्ने योजना बनाएको दाबी गरेका छन् ।
शुक्रबार सरकारले एडभाइजरी जारी गरेपछि शनिबार झन्डै १० हजार पर्यटक र तीर्थयात्रीले कस्मिर छोडेका छन्। पर्यटकमात्र होइन विद्यार्थी र क्रिकेटरलाई पनि कस्मिर छोड्न भनिएको छ। भारतका अलराउन्डर इरफान पठान कस्मिरमा थिए। उनीसहित क्याम्पमा रहेका १०० जना क्रिकेटर पनि कस्मिर छोड्दैछन्।कस्मिरमा पछिल्ला केही दिनयता हजारौं सुरक्षाकर्मी थपिएको छ।
के हुन लागेको भन्ने अनिश्चितता यति छ कि स्थानीय मानिसहरू दैनिक उपभोग्य सामानको भण्डारण गर्न लागेका छन्। अब एक दुई महिना कस्मिर बन्द हुन्छ भन्ने ठानेर उनीहरू गाडीमा मात्र होइन प्लास्टिकका बोतलमा पनि पेट्रोल भरेर राखिरहेका छन्। किराना पसलदेखि एटिएम कार्डमा लाइन लागेको छ।
प्रतिपक्षी भारतीय कंग्रेसका स्थानीय नेता गुलाम अलि आजादले बिबिसी हिन्दीसँग कुरा गर्दै अहिले अवस्थाले कार्गिल युद्धको याद दिलाएको बताएका छन्।
तर यो सब किन भइरहेको छ भन्नेबारे न त स्थानीय सरकारले जानकारी दिएको छ न त नयाँदिल्लीको केन्द्र सरकार नै बोलेको छ।
भारतीय व्याख्याअनुसार कस्मिरको केरन क्षेत्रमा पाकिस्तानी बोर्डर एक्सन टिमले आक्रमण गर्न लागेका थिए। भारतले जवाफी कारबाही गर्दा एक जना चार वर्षीय बालकसहित २ जनाको मृत्यु भएको र ११ जना नागरिक घाइते भएको पाकिस्तानी सेनाको दाबी छ।
उनीहरूको शव अहिले भारततिर भएकाले सेतो झन्डा देखाउँदै आएर शव लैजान भनिएको समाचारमा उल्लेख छ।पाकिस्तानले भने भारतीय पक्षको ब्याख्यालाई खण्डन गरेको छ।
अमरनाथमा हरेक वर्ष ४५ दिने तीर्थयात्रा हुन्छ । समाचारसंस्था एपीका अनुसार गत जुलाई १ तारिखबाट सुरु भएको उक्त तीर्थयात्राका क्रममा हालसम्म झन्डै तीन लाख जना अमरनाथ पुगिसकेका छन् । अमरनाथ कश्मीरको उच्च हिमाली क्षेत्रमा रहेको एउटा गुफा हो ।
