काठमाडौं । त्रिशूली ३ बी २ सय २० केभी हब सबस्टेसन आयोजनाको ६० प्रतिशत निर्माण कार्य सकिएको छ । आयोजनाको ट्रान्सफर्मर रहने स्थानमा जग हालिएको र कन्ट्रोल बिल्डिङ बनाउन सुरु भएको विद्युत् प्राधिकरणका कार्यकारी निर्देशक कुलमान घिसिङले जानकारी दिए । उनका अनुसार सबस्टेसन सुरक्षाका लागि त्रिशूली नदी–किनारमा पर्खाल लगाउने काम अन्तिम चरणमा छ । सबस्टेसनमा प्रयोग हुने उपकरणको उत्पादन भइरहेको र डेढ महिनाभित्र आयोजनास्थलमा आपूर्ति सुरु हुनेछ ।
नुवाकोटको किस्पाङ गाउँपालिका–५ पहिरेबेंसीमा निर्माणाधीन सबस्टेसनको स्थलगत निरीक्षण गर्न पुगेका घिसिङले आयोजना व्यवस्थापन, परामर्शदाता र ठेकेदार कम्पनीलाई तोकिएकै समयमा निर्माण सम्पन्न गर्न निर्देशन दिए । निर्माण कार्यको नियमित अनुगमन गर्ने बताउँदै उनले जनशक्ति थप्न ठेकेदार कम्पनीलाई आग्रह गरे । ‘यो सबस्टेसन एक वर्षभित्र पूरा नभए चिलिमे जलविद्युत् कम्पनीका सहायक कम्पनीले निर्माण गरिरहेका आयोजनाको १ सय ६८ मेगावाट बिजुली राष्ट्रिय प्रणालीमा जोड्न सकिँदैन । खेर फाल्नुपर्ने अवस्था आउन सक्छ,’ उनले भने, ‘प्राधिकरणले ती आयोजनालाई करोडौँ रुपैयाँ जरिवाना तिर्नुपर्ने हुन सक्छ ।’ उनले निर्माणका क्रममा आउन सक्ने अवरोध हटाइदिनेसमेत बताए ।
चिलिमे–त्रिशूली प्रसारण लाइनको प्रगति ४५ प्रतिशत
चिलिमे–त्रिशूली २ सय २० केभी प्रसारण लाइन आयोजनाको भौतिक प्रगति ४५ पुगेको छ । आयोजनाले रसुवाको चिलिमेदेखि त्रिशूली ३ बी २ सय २० केभी हब सबस्टेसनसम्म २७ किलोमिटर प्रसारण लाइन र चिलिमेमा सबस्टेसन निर्माण गरिरहेको छ । जनताको जलविद्युत् कार्यक्रमअन्तर्गत चिलिमे जलविद्युत् आयोजनाको अगुवाइमा निर्माणाधीन १ सय ११ मेगावाटको रसुवागढी, ४२.५ मेगावाटको सान्जेन, १४.८ मेगावाटको माथिल्लो सान्जेन यही प्रसारण लाइनमा जोडिनेछ ।
आयोजनाले चिलिमेबाट मैलुङसम्म १९ किलोमिटर डबल सर्किट र मैलुङबाट त्रिशूली ३ बी हबसम्म ८ किलोमिटर चार सर्किट निर्माण गर्नेछ । प्रसारण लाइनका ८० टावरमध्ये १५ वटाको जग हाल्न खाल्डो खनिएको आयोजना प्रमुख केदार सिलवालले बताए ।, समाचार नयाँ पत्रिका दैनिकमा प्रकाशित छ ।
