काठमाडौँ । बिहीबार पाकिस्तानी राजदूतावासले आयोजना गरेको सातौँ वार्षिक नेपाल–पाकिस्तान टी–२० क्रिकेट प्रतियोगिताको उपाधि उपाधि आरएस विद्याथ क्रिकेट क्लबले जितेको छ ।
प्रतियोगितामा नेक्सस क्रिकेट क्लब उपविजेता भयो । नौ दिनसम्म चलेको क्रिकेट प्रतियोगितामा विभिन्न नेपाली क्रिकेट क्लबसहित १२ टोलीको सहभागिता रहेको थियो । पुरस्कार वितरण समारोहमा भूमि व्यवस्था, सहकारी तथा गरिबी निवारण सचिव रामप्रसाद थपलियाले वार्षिक कार्यक्रमको आयोजनामा दूतावासको प्रयासको प्रशंसा गर्दै यस्ता खेलकुद कार्यक्रमहरू आयोजना गरेर नेपाल र पाकिस्तानबीचको द्विपक्षीय सम्बन्धलाई अझ प्रगाढ बनाउन सक्ने ठूलो सम्भावना रहेको बताउनुभयो ।
कार्यक्रममा नेपालका लागि पाकिस्तानी राजदूत सैयद हैदर शाहले नेपाली युवामा यस वार्षिक कार्यक्रमको बढ्दो लोकप्रियताप्रति सन्तुष्टि व्यक्त गर्नुभयो । उहाँले प्रतियोगिता नेपाल र पाकिस्तानबीचको सौहार्दपूर्ण र मैत्रीपूर्ण सम्बन्धको प्रमाण भएको बताउनुभयो ।
राजदूत शाहले दुई देशका युवाहरूलाई एक ठाउँमा ल्याउन र पाकिस्तान र नेपालबीचको जनस्तरको सम्पर्कलाई अझ मजबुत बनाउन यस्ता कार्यक्रमहरूलाई निरन्तरता दिने प्रतिबद्धता व्यक्त गर्नुभयो ।
