काठमाडौँ । नेकपाका अध्यक्ष प्रचण्डले आफूले ‘पार्टी एकता नगरेको भए हुन्थ्यो’ भनेर नभनेको स्पष्ट गरेका छन् । उनले आफ्नो भनाईको अपव्याख्या गरिएको बताएका हुन् । अध्यक्ष प्रचण्डले भने, ‘मैले त्यसो भनेकै होइन । पार्टी एकता गरिसकेका हौं । अब विकल्प छैन भनेको हो । यसलाई मिडियामा अपब्याख्या गरियो ।’
आफू बोलेको सो कार्यक्रममा नेकपाका महासचिव विष्णु पौडेल पनि रहेको र मिडियामा अपब्याख्या भएर आउँदा पौडेल पनि आश्चर्यमा परेको दाहालले सुनाएका हुन् । केही दिन अघि आफूले काठमाडौँमा एक कार्यक्रममा बोल्ने क्रममा ‘पार्टी एकता गर्नु गल्ती भयो’ भनेर आफूले भनेको भनेर प्रचार गरिएकोमा उनको सो भनाई रहेको थियो ।
दाहालले अब पार्टीभित्र ‘पूर्व माओवादी, पूर्व एमाले भनेर माथापच्ची गर्नुको अर्थ नरहेको धारणा पनि राखेका थिए । सोमबार पत्नी सीतासहित जनकपुर आएका प्रचण्डले सो धारणा राखेका हुन् । उनले ‘नेकपाको सरकार ५ वर्षसम्म रहने बताए । सोमबार जनकपुर विमानस्थलमा संवाददाताहरुसित कुरागर्दै प्रचण्डले भने, ‘सरकार ५ वर्ष जान्छ र प्रधानमन्त्री जी पनि समझदारीअनुसार चल्नुहुन्छ ।’
सम्वाददाताहरुले ओली सरकार कि नेकपालको सरकार पाँच वर्ष जान्छ भन्दा उनले भने– नेकपालको सरकार पाँच वर्ष चल्छ र ओलीजी समझदारीअनुसार चल्नुहुन्छ भन्ने हाम्रो विश्वास छ । धनुषाको बरमझियामा सहिद रामवृक्ष यादवको स्मृतिसभामा सहभागी हुन दाहाल नेकपाका वरिष्ठ नेता माधवकुमार नेपालसहित जनकपुर आएका हुन् ।