धनुषा । बोक्सीको आरोपमा महिलालाई दुर्व्यवहार गर्ने महोत्तरी भंगहाका २ जनालाई प्रहरीले पक्राउ गरेको छ । शनिबार साझ घाँस काटदै गरेकी महिलालाई घरायसी विवादमा बोक्सीको आरोप लगाउँदै मलमूत्र खुवाएको जाहेरी आएपछि पक्राउ गरिएको महोत्तरीका प्रहरी उपरीक्षक श्याम अधिकारीले बताए ।
भंगहा नगरपालिका–४ की एक ३५ वर्षीया चन्दनदेवी दनुवारलाई कुटपिट गर्दै ४ जना स्थानीयले मलमूत्र खुवाएको जाहेरी जिल्ला प्रहरी कार्यालयमा आएपछि आफुहरुले त्यसमा एक्शन लिएको प्रहरी उपरीक्षक अधिकारीले बताए । पीडित महिलालाई स्थानीय ३५ वर्षीया सवितादेवी सिंह, ३० वर्षीया इन्दुकुमारी दनुवार, ५० वर्षीया सुक्नी देवी र ५० वर्षीया सुकेश्वरी देवीले मलमूत्र खुवाउँदै कुटपिट गरेका थिए ।
मलमूत्र खुवाउने इन्दु र सुकेश्वरीलाई प्रहरीले शनिबार साँझ नै पक्राउ गरेको र अन्य दुई फरार भएको प्रहरी नायब उपरीक्षक माधव बुढाथोकीले बताए । पीडित महिलाको जिल्ला अस्पताल जलेश्वर, महोत्तरीमा उपचार भइरहेको छ ।
