काठमाडौं । संविधान दिवसको अवसरमा नेपाल भ्रमण गर्न प्रधानमन्त्री केपी शर्मा ओलीले आफ्नो भारतीय समकक्षीलाई निमन्त्रणा दिएका छन् । तर, त्यसमा पनि प्रधानमन्त्री मोदी नआउने लगभग पक्का भएको छ । प्रधानमन्त्री कार्यालय स्रोतका अनुसार प्रधानमन्त्री ओलीले भारतीय प्रधानमन्त्री मोदीलाई संविधान दिवसमा आउन निमन्त्रणा दिएका थिए ।
नेपालले असोज ३ मा संविधान दिवस मनाउदा दिन मोदी अमेरिकामा हुनेछन् ।
तर, प्रधानमन्त्रीका परराष्ट्र सल्लाहकार डा. राजन भट्टराईले यसको बारेमा आफूलाई कुनै जानकारी नरहेको बताए ।
त्यस्तै, नेपालस्थित भारतीय दूतावासका प्रवक्ता अभिषेक द्वीवेदीले यो विषयमा कुनै प्रतिकृया नै दिन मानेनन् । असोज २ गते दिल्लीबाट अमेरिका प्रस्थान गर्ने मोदी असोज ३ गते अमेरिका पुग्नेछ । असोज ४ गते वासिङ्टन डिसी, ५ गते हस्टन, ६ गते न्युयोर्क र ७ गते सिकागो जानेछन् ।
उता, पेट्रोलियम पाइपलाइन उद्घाटन गर्ने कार्यक्रमको तयारी पनि भइरहेको छ । उद्योग मन्त्रालय स्रोतका अनुसार भदौ २४ गते दुवै देशका प्रधानमन्त्रीले भिडियो कन्फरेन्समार्फत पाइपलाइनको उद्घाटन गर्ने तयारी गरिरहेको बताईएको छ ।
