वीरेन्द्रनगर । कार्यालय प्रमुखको कार्यशैलीप्रति असन्तुष्टि जनाउँदै सुर्खेत उपत्यका खानेपानी उपभोक्ता संस्थाका कर्मचारीहरू आन्दोलनमा उत्रिएका छन्।
कार्यालय प्रमुख डम्बर गौतमले आफूहरूको हकहितविपरीत काम गरेको आरोप लगाउँदै उनीहरूले चरणबद्ध आन्दोलनसमेत घोषणा गरेका छन्।
मंगलबार पत्रकार सम्मेलनमार्फत उनीहरूले कार्यालय प्रमुखले पदीय मर्यादाविपरीत संस्थामा कार्यरत कर्मचारीको अहित हुने काम गरेकाले आन्दोलनमा उत्रिन बाध्य भएको बताए।
संस्थामा कार्यरत दैनिक ज्यालादारीलाई करारमा राख्ने, करारलाई स्थायी बनाउने र एक पटक पनि बढुवा नभएका स्थायी कर्मचारीलाई बढुवा गर्ने संस्थाको निर्णय कार्यान्वन गर्न कार्यालय प्रमुखले अवरोध सिर्जना गर्दै आएको उनीहरूको गुनासो छ।
कर्मचारीको प्रगति देख्न नचाहने कार्यालय प्रमुख गौतमलाई असहयोग गर्ने, समन्वय र सहकार्य नगर्ने निर्णय कर्मचारीले गरेको श्रमिक ट्रेड युनियनका अध्यक्ष गणेशमान खनालले बताउनुभयो।
‘कर्मचारीको उचित व्यवस्थापन नभएसम्म भदौ १२ गतेसम्म कार्यकक्ष बाहिरै बसेर काम गर्ने निर्णय गरेका छौं’, उहाँले भन्नुभयो– ‘१३ गतेदेखि खानेपानी वितरणबाहेकका दैनिक मर्मत संभार, धारा जडानजस्ता काम ठप्प पार्छौं।’
भदौ १८ गतेदेखि महसुल नबुझ्ने र भदौ २१ गतेसम्म पनि समस्या समाधान नभए आन्दोलनलाई थप सशक्त पर्ने निर्णय श्रमिक ट्रेड युनियनले गरेको समेत अध्यक्ष खनालले बताउनुभयो।
दैनिक ज्यालादारी, करार र स्थायी गरी अहिले संस्थामा ६२ जना कर्मचारी कार्यरत रहेको संस्थाका इन्जिनियर बालाराम तिवारीले बताउनुभयो। कार्यालय प्रमुखबाहेक ६१ जना कर्मचारी आन्दोलनमा उत्रिएको दाबीसमेत उहाँको छ।
सुर्खेत उपत्यका खानेपानी उपभोक्ता संस्थाका कर्मचारीले आफूहरूको समस्या सामाधान गर्न कर्णाली प्रदेश सरकारसहित सबै सरोकारवाला पक्षसँग आग्रह पनि गरेका छन्।, समाचार नेपाल समाचारपत्र दैनिकमा प्रकाशित छ ।
