काठमाडौं। नेपाली कांग्रेसका वरिष्ठ नेता रामचन्द्र पौडेल बिरामी भएपछि हिजो बुधबार आह्वान गरिएको केन्द्रीय समिति बैठक स्थगित भएको छ। आफ्नो इन्डोस्कोपी गरेको र एक दिन आराम गर्न चिकित्सकले सल्लाह दिएपछि वरिष्ठ नेता पौडेलले सभापति देउवालाई बैठक स्थगित गर्न आग्रह गर्नुभएको थियो। बैठक आज बिहीबार पुनः बस्ने भएको छ।
आज हुने कांग्रेस बैठकमा समय सकिएका भ्रातृ संस्थाका बारेमा कसरी अधिवेशन हुन्छ भनेर नीतिगत निर्णय हुने केन्द्रीय सदस्य तथा राष्ट्रिय सभाका प्रतिपक्षी दलका प्रमुख सुरेन्द्रराज पाण्डेले बताउनुभएको छ।
कांग्रेसभित्र वरिष्ठ नेता उपस्थित नहुँदा बैठक स्थगित गर्ने परम्परा रहेको केन्द्रीय सदस्य शिवप्रसाद हुमागार्इंले बताउनुभएको छ। गुटउपगुटमा विभाजित कांग्रेसभित्र पौडेल पक्षले ४० प्रतिशतको भागवण्डा खोज्ने गरेको छ।
यसअघि तत्कालीन अवस्थामा सभापति सुशील कोइराला सभापति हुँदा पनि तत्कालीन वरिष्ठ नेता देउवा अनुपस्थित भएको बेला केन्द्रीय समिति बैठक स्थगित गर्ने गरिएको थियो।
बैठकमा नेपाल विद्यार्थी संघ, नेपाल तरुण दललगायत भ्रातृ एवं शुभेच्छुक संघसंस्थाको विधान संशोधन र मान्यता प्रदानका साथै अन्य महत्वपूर्ण निर्णय गर्ने एजेन्डा थियो। यो बैठकले खास गरी शीर्ष नेताहरूको टाउको दुखाइको विषय बनेको नेपाल विद्यार्थी संघको १२औं महाधिवेशनको लफडा सुल्झाउने अपेक्षा गरिएको छ।
पटकपटक म्याद थप्दा पनि अधिवेशन हुन नसकेको नेविसंघ नेतृत्वविहीन छ।नेपाली कांग्रेसको नर्सरीका रूपमा रहेको नेविसंघ मात्र हैन नेपाल तरुण दलको हालत पनि त्यस्तै छ। चार नेताको भरमा रहेको तरुण दलको अधिवेशन भएको वर्षौं बित्दा पनि कार्यसमितिले पूर्णता पाएको छैन।
कांग्रेसको सशक्त भ्रातृ संगठनका रूपमा रहेको तरुण दल माउ पार्टीजस्तै अझै संघीय संरचनामा पनि जान सकेको छैन। चौथो महाधिवेशनबाट चुनिएका चार नेताको भरमा रहेको तरुण दलको म्याद सकिन ६ महिना मात्र बाँकी छ।
विधानमा कार्यसमितिको कार्यकाल तीन वर्ष उल्लेख भए पनि कार्यसमितिले पूर्णता नपाउँदा तरुण दलको अवधि कहिलेदेखि गणना हुने भन्ने बारेमा पनि अन्योल देखिएको छ।
चौथो महाधिवेशनमा माउपार्टीभित्र रहेका चरम गुटबन्दीलाई मिलाउन तरुणदलको ६१ सदस्यीय कार्यसमितिको आकार बढाएर ९५ सदस्यीय समिति बनाइएको भए पनि अहिले अध्यक्ष, उपाध्यक्ष, महासचिव र कोषाध्यक्ष गरी तरुण दल चार जना पदाधिकारी मात्र छन्।
मुलुक संघीय संरचना गइसकेको र पछिल्लो समय अन्य विधिन्न कुराहरू समेट्नुपर्ने भएकाले विधान मस्यौदा तयार पार्न महासचिवको संयोजकत्वमा समिति बनाउने भनिए पनि यो कुरा अहिलेसम्म पनि अलमलमै छ।कांग्रेसका अन्य भ्रातृ एवं शुभेच्छुक संघसंस्था पनि लथालिंग अवस्थामा छन्।
कतिपय भ्रातृ संस्थाको अधिवेशन नभएको वर्षौं बितिसकेको छ भने कतिपय संस्था अधिवेशनको दौरानमा विवादित भएर बसेका छन्। बैठकमा सरकारको पछिल्लो क्रियाकलाप बारेमा पनि कांग्रेसको धारणा ल्याउने तयारी थियो।
बुधबार बैठकमा सहभागी हुन सभापति देउवालगायत अन्य पदाधिकारी र केन्द्रीय सदस्यहरू पार्टी केन्द्रीय कार्यालयमा उपस्थित भइसकेका भए पनि वरिष्ठ नेता पौडेलले आफू एक दिन घरमै आराम गरेर बस्ने र आज बिहीबार मात्र आउने भनेपछि सभापतिले बैठक स्थगित गर्नुभएको कांग्रेस केन्द्रीय कार्यालयले जनाएको छ।, समाचार नेपाल समाचारपत्र दैनिकमा प्रकाशित छ ।
