काठमाडौं । चौतर्फी भ्रष्टाचार बढ्दा पनि सशक्त रूपमा आवाज उठाउन नसकेको भन्दै कांग्रेस केन्द्रीय सदस्यहरूले नेतृत्वको विरोध गरेका छन् । केन्द्रीय समितिको बैठकमा पेस भएको राजनीतिक प्रस्तावमाथिको छलफलमा भाग लिँदै केन्द्रीय सदस्यहरूले वाइडबडी, सुनकाण्ड, बालुवाटार जग्गा प्रकरण, बुढीगण्डकी आयोजनालगायतमा व्यापक भ्रष्टाचार हुँदासमेत प्रतिपक्षीका रूपमा कांग्रेसले सशक्त आवाज नउठाएको आरोप लगाए । डा. रामशरण महत, अर्जुननरसिंह केसी, प्रदीप पौडेल, नवीन्द्रराज जोशी, देवेन्द्रराज कँडेल, धनराज गुरुङसहितका नेताहरूले सरकारको भ्रष्टाचारविरुद्ध सशक्त आवाज उठाउनुपर्ने बताए ।

भ्रष्टाचारविरुद्ध सदन, सडक, स्थानीय तह, प्रदेश सबैतिर कांग्रेसले सशक्त आवाज उठाउनुपर्ने भन्दै आफ्नो पार्टीले जितेका स्थानीय तहमा रचनात्मक काम गर्न सुझाएका छन् । बैठकमा बलबहादुर केसी, फरमुल्लाह मन्सुर, आनन्दप्रसाद ढुंगाना, कमला पन्त, धनराज गुरुङ, रामकृष्ण यादव र मोहनबहादुर बस्नेतसहितका नेताले सरकारको बेथितिविरुद्ध पार्टीलाई सशक्त बनाएर लानुपर्ने बताए ।

कांग्रेस बैठकमा किसान संघ र दलित संघको विधान पेस भएको जानकारी प्रवक्ता विश्वप्रकाश शर्माले दिए । महामन्त्री पूर्णबहादुर खड्काले केही भ्रातृ एवं शुभेच्छुक संस्थाहरूको विधान स्वीकृतिका लागि पेस गरेका थिए ।

सहमहामन्त्रीको राजनीतिक प्रस्तावमा के छ ?
बैठकमा सहमहामन्त्री डा। प्रकाशशरण महतले राजनीतिक प्रस्ताव पेस गरे । प्रस्तावमा सिंगापुरबाट मन्त्रिपरिषद् बैठक चलाइकोमा विरोध, वाइडबडीसहितका भ्रष्टाचारका विषय, संविधान संशोधन नगरेर मधेसलाई अलपत्र पारिएका विषय उठाइएका छन् । भिडियो कन्फ्रेन्सबाट मन्त्रिपरिषद् बैठक चलाउँदा राष्ट्रको गोपनीयता नै भंग भएको आरोप प्रस्तावमा लगाइएको छ । उनको प्रस्तावमा स्थानीय तह, प्रदेश र केन्द्र सबैतिर भ्रष्टाचार मौलाएको विषय उल्लेख छ ।

कांग्रेस बैठकमा प्रश्न : रवि लामिछानेको पक्षमा जनलहर किन देखियो ?
कांग्रेस केन्द्रीय समितिको बैठकमा पत्रकार रवि लामिछानेको विषयले प्रवेश पाएको छ । नेता अर्जुननरसिंह केसीले पत्रकार शालिकराम पुडासैनीले आत्महत्या गरेको हो कि हत्या भएको भन्ने विषयलाई राज्यले प्रस्ट पार्नुपर्ने बताए । साथै, पुडासैनीको मृत्युपछि रवि लामिछानेका पक्षमा देखिएको लहर राज्यप्रतिको आक्रोश, बेथितिको विरोध र भ्रष्टाचारको विरोध भएको उनको भनाइ थियो ।

‘पत्रकार रवि लामिछानेविरुद्ध मुद्दा चलेको छ । तर, रविको पक्षमा किन यस्तो लहर देखियो ? भ्रष्टाचार, बेथितिविरुद्ध रहेका जनताले उपस्थिति देखाएका छन् । यसबारे पार्टीले बोल्नुपर्छ’, उनले भने । देवेन्द्रराज कँडेलले पनि यो विषयमा कुरा उठाए । ‘रवि लामिछानेको सन्दर्भमा त्यत्रो मास किन सडकमा ओर्लियो ? सरकार र राजनीतिक दलका नेतामाथि आमविश्वास नभएकाले, नेताले बोलेका कुरा पूरा नगर्दा यस्तो भएको हो,’ कँडेलले भने, ‘रविले मिडियामार्फत जनताको आवाज, भावना र समस्यालाई चिरफार गरे । यसैले उनीप्रति जनताले विश्वास देखाएका हुन् । हामीले यतापट्टि सोच्नुपर्छ । हामीप्रतिको जनविश्वास टुट्दै गएको छ । हामी कहिले सचेत हुने ?’

बैठकमा कसले के भने ?

हामी जनताको आशा बन्नुपर्छ : कृष्णप्रसाद सिटौला
जनताको नजर यतिखेर प्रतिपक्षीतिर पनि छ । आन्तरिक भ्रातृ संस्थाका विषय मिलाएर हामी अघि बढ्नुपर्छ । हामी जनताका आशा बन्नुपर्छ ।

गुट हटाऔँ : सुजाता कोइराला
हामी गुटगत राजनीति र टुटफुटमा लाग्दा कमजोर भएका छौँ । एकजुट र बलियो कांग्रेस भए मात्रै हामी विपक्षीलाई चुनौती दिन सक्छौँ । कम्युनिस्ट फैलने र हामी खुम्चने अवस्था आउन दिनुहुन्न ।

भ्रष्टाचारबाट जनता वाक्क छन् : अर्जुननरसिंह केसी
दलित संघको विधानले केन्द्रीय सदस्य भएपछि मात्रै पदाधिकारी लड्न पाउने र पदाधिकारी भइसकेकाले मात्र अध्यक्ष लड्न पाउने व्यवस्था ठीक छैन । भ्रष्टाचारबाट जनता वाक्क भएका छन् । तसर्थ हामीले आवाज उठाउनैपर्छ ।

आर्थिक मुद्दामा पार्टी बोल्नुपर्‍यो : डा. रामशरण महत
आर्थिक मुद्दामा पनि पार्टी बोल्नुपर्‍यो । सेयर घटेको छ । भ्रष्टाचार बढेर गएको छ । लगानी घटेर गएको छ । उत्पादन बढ्न सकेको छैन । यी कुरालाई हामी किन एजेन्डा बनाउँदैनौँ ?

व्यवस्था बचाउने जिम्मा कांग्रेसको हो : नवीन्द्रराज जोशी
सरकार सबै कब्जा गर्न उद्यत छ । सिस्टमलाई खत्तम गर्न लागेको छ । यसलाई बचाऔँ । जनतामा निराशा छ, यसलाई आशामा परिणत गराउन लागौँ ।

भ्रष्टाचारका मुद्दा किन प्राथमिकतामा पर्दैनन् : प्रदीप पौडेल
भ्रष्टाचारका विषय छरपस्ट छन् । यी विषयलाई जनताले बुझ्ने गरी प्राथमिकताकासाथ उठाउनुपर्छ । भ्रष्टाचारका केही मुद्दामा हामी डिफेन्सिभ हुँदा जनताको बीचमा आरोप पुष्टि भएको देखिन्छ । त्यसैले भ्रष्टाचारको विषयलाई जोडदार ढंगले उठाउनुपर्छ ।, समाचार नयाँ पत्रिका दैनिकमा प्रकाशित छ ।