काठमाडौं । नेपाली कम्युनिष्ट पार्टी (नेकपा) का प्रमुख सचेतक युवराज दुलालले मेलम्ची खानेपानी आयोजनाबाट प्रभावित तथा स्थानीय भेन्डर्सका माग तत्काल सम्बोधन गर्न सरकारको ध्यानाकर्षण गराउनुभएको छ ।
प्रतिनिधि सभाको बिहीवारको बैठकमा बोल्दै दुलालले मेलम्ची खानेपानी आयोजनाका प्रभावित पीडित भेन्डर्स संघर्ष समितिले बिहीवारदेखि आयोजनाका सवारीसाधन तथा कर्मचारीलाई आयोजनास्थल प्रवेशमा रोक लगाउने घोषणा गरेको जानकारी गराउनुभयो ।
उहाँले आन्दोलनका कारण मेलम्ची खानेपानी आयोजनाको काम प्रभावित भई आयोजना सञ्चालनमा समस्या आउन सक्ने भन्दै सरकारलाई समयमै समस्या समाधान गर्न आग्रह गर्नुभयो ।
दुलालका अनुसार मेलम्ची बाढी तथा खानेपानी आयोजनाबाट प्रभावित पीडित र स्थानीय भेन्डर्सले यसअघि पानी पथान्तरण बन्द गरेर सरकारसँग विभिन्न सम्झौता गरेका थिए । तर, ती सम्झौता अझै कार्यान्वयन हुन नसकेको उहाँको भनाइ छ ।
मेलम्ची बाढीपीडित संघर्ष समितिले प्रभावित क्षेत्रको पुनर्निर्माण, सडक निर्माण तथा बाढीबाट क्षतिग्रस्त संरचनाको पुनर्निर्माणलाई मुख्य माग बनाएको दुलालले बताउनुभयो । यस्तै, स्थानीय भेन्डर्सले आफूहरूले सरकारबाट प्राप्त गर्नुपर्ने रकम तथा अन्य माग सम्बोधन हुनुपर्ने विषय उठाउँदै आएको उहाँले उल्लेख गर्नुभयो ।
दुलालले विगतका सम्झौता कार्यान्वयन नभए पुनः पानी पथान्तरण बन्द गर्नुपर्ने अवस्था आउन सक्ने र त्यसबाट सर्वसाधारणले दुःख पाउने स्थिति सिर्जना हुने बताउनुभयो ।
उहाँले सरकारसमक्ष मेलम्चीदेखि हेलम्बुसम्मको सडक निर्माणका लागि बहुवर्षीय ठेक्का तत्काल स्वीकृत गर्न र मेलम्चीदेखि पाँचपोखरीसम्मको सडकको बहुवर्षीय ठेक्का प्रक्रिया अविलम्ब अघि बढाउन माग गर्नुभयो । साथै, सरकारले विगतमा पीडितहरूसँग गरेका सम्झौता तत्काल कार्यान्वयन गर्न पनि उहाँले आग्रह गर्नुभयो ।
