काठमाडौं । पेरुमा राजधानी लिमाको उत्तरतर्फको तटीय नगरमा इतिहासकै सबैभन्दा ठूलो बालबालिकाहरूको सामूहिक चिहान फेला परेको छ । पुरातत्त्वविद्हरूले उत्खनन गरेको उक्त चिहानमा पाँचदेखि १४ वर्ष उमेरका २२७ जना बालबालिका भेटिएको हो।
ती बालबालिकाहरूको पाँच सय वर्षभन्दा अघि हत्या गरिएको ठानिएको छ।पुरातत्त्वविद्हरूले समाचार संस्था एएफपीलाई बताए अनुसार पछिल्लो उत्खननमा भेटिएका केही शवसँगै छाला र रौँ पनि थिए।
देशका अन्य दुईवटा भागमा २०० जना बालबालिकाको चिहान भेटिएको मात्र एक वर्षपछि पछिल्लो चिहान फेला परेको हो।
सामूहिक चिहान रहेको ठाउँमा उत्खननको काम चलिरहेको छ। पुरातत्त्वविद्हरूले अझैँ पनि थप शवहरू फेला पर्न सक्ने बताएका छन्।प्राप्त सङ्केतहरूले जाडो याममा बालबालिकाको हत्या गरिएको देखाएका छन् र समुद्रतर्फ फर्काएर गाडिएका छन्।
त्यसको अर्थ सम्भवतः चिमुले भगवान्लाई खुशी पार्न बालबलि चढाइएको हो।पेरुको उत्तरी तटसँगै चिमु बसोबासको केन्द्र थियो, जुन त्यस क्षेत्रको एउटा शक्तिशाली सम्भता मानिन्छ।