काठमाडौं । नेकपा एमालेकी सांसद सम्झना देवकोटाले सरकारका मन्त्रीहरूलाई सामाजिक सञ्जालमा हुने वाद–प्रतिवादमा अल्झिनुभन्दा जिम्मेवारीअनुसार काम र परिणाममा केन्द्रित हुन आग्रह गर्नुभएको छ ।
राष्ट्रिय सभाको बुधवारको बैठकमा बोल्दै सांसद देवकोटाले विपद् व्यवस्थापन, पुनर्निर्माण, रोजगारी सिर्जना, प्रविधि विकास र अन्तर्राष्ट्रिय कूटनीतिलगायत विषयमा सरकारले प्रभावकारी रूपमा काम गर्नुपर्ने बताउनुभयो ।
उहाँले आविष्कार केन्द्रका प्रमुख आविष्कारकसमेत रहनुभएका मन्त्री पुन थकित र निराश देखिएको भन्दै दुःख व्यक्त गर्नुभयो । सामाजिक सञ्जालमा हुने प्रतिवादमा समय खर्चिनुभन्दा विज्ञान तथा प्रविधिको क्षेत्रमा नयाँ आविष्कारका लागि ऊर्जा लगाउन उहाँले सुझाव दिनुभयो ।
गृहमन्त्रीले पनि भाषण र प्रतिवादमा भन्दा हत्या, हिंसा तथा आतङ्क अन्त्य गर्ने काममा ध्यान दिनुपर्ने देवकोटाको भनाइ थियो । उहाँले गृहमन्त्रीले साँचो अर्थमा देशको अभिभावकको भूमिका निर्वाह गर्नुपर्ने बताउनुभयो ।
भोटेकोशी र त्रिशूली नदीमा आएको बाढीबाट भएको क्षतिपछि गरिने पुनर्निर्माणमा विगतका कमजोरीबाट पाठ सिक्नुपर्ने उहाँले बताउनुभयो । नदी करिडोर तथा नदी किनारमा ठूला संरचना र बस्ती विकास गर्दा भौगोलिक जोखिमलाई पर्याप्त ध्यान नदिइएको हुनसक्ने उहाँको भनाइ थियो ।
अबको पुनर्निर्माणमा नेपालको भौगोलिक विविधता र जोखिमलाई ध्यानमा राख्दै मध्यपहाडी क्षेत्रमा ऊर्जा तथा भौतिक पूर्वाधार विकासको सम्भावनालाई प्राथमिकतामा राखेर योजना बनाउनुपर्ने देवकोटाले बताउनुभयो । पुनर्निर्माणका क्रममा देशभित्र उपलब्ध विशेषज्ञ तथा दक्ष जनशक्तिको अधिकतम उपयोग गर्न पनि उहाँले सरकारलाई आग्रह गर्नुभयो ।
मुलुकमा देखिएको वस्तु अभाव र मूल्यवृद्धि राजनीतिक आरोप–प्रत्यारोपबाट समाधान नहुने उहाँले बताउनुभयो । सरकारले आपूर्ति व्यवस्थापन प्रभावकारी बनाउँदै कालोबजारी नियन्त्रण गरी नागरिकलाई सहज जीवनयापनको वातावरण सिर्जना गर्नुपर्नेमा उहाँले जोड दिनुभयो ।
सरकार र राजनीतिक दलहरूले ‘सानो मन’ नराखी सहकार्य र सहअस्तित्वका आधारमा अघि बढ्नुपर्ने बताउँदै देवकोटाले संसद्लाई आलोचना र वाद–प्रतिवादको मञ्चभन्दा जनताको आवाज उठाउने तथा राष्ट्र निर्माणमा केन्द्रित हुने फोरमका रूपमा विकास गर्नुपर्ने बताउनुभयो ।
