काठमाडौं । स्वास्थ्य तथा खाद्य स्वच्छतामन्त्री निशा मेहताले सप्तरीको राजविराजमा अस्पतालबाहिरै बच्चा जन्माउन बाध्य भएकी बबिताकुमारी पासवानको घटनामा दोषी देखिएका चिकित्सक, नर्स तथा कर्मचारीमाथि कारबाही प्रक्रिया अघि बढाइएको बताउनुभएको छ ।
राष्ट्रिय सभाको बुधबारको बैठकमा सांसद श्रीकृष्णप्रसाद अधिकारीको प्रश्नको जवाफ दिँदै मन्त्री मेहताले नेपाल मेडिकल काउन्सिल र स्वास्थ्य मन्त्रालयको टोलीले घटनाको स्थलगत छानबिन गरी प्रतिवेदन बुझाइसकेको जानकारी दिनुभयो ।
उहाँका अनुसार छानबिन प्रतिवेदनले आचारसंहिता उल्लंघन गरेको देखाएका चिकित्सक, नर्स तथा प्रशासनिक कर्मचारीलाई आवश्यक कारबाहीका लागि सम्बन्धित काउन्सिलमा पठाइएको छ ।
मन्त्री मेहताले गजेन्द्रनारायण सिंह अस्पतालमा जनशक्ति व्यवस्थापन कमजोर रहेको समेत पाइएको बताउनुभयो । अस्पतालमा ८० जना अस्थायी दरबन्दी थप गर्ने प्रस्तावमा अर्थ मन्त्रालयको सहमति भइसकेको र अब मन्त्रिपरिषद्मा प्रस्ताव लैजाने तयारी भइरहेको उहाँले जानकारी दिनुभयो । यस्तै, थप सात जना चिकित्सकलाई दुई वर्षका लागि अस्पतालमा खटाइएको उहाँले बताउनुभयो ।
मन्त्री मेहताले सुरक्षित मातृत्व सुविधा मात्र नभई हरेक आमाको अधिकार भएको उल्लेख गर्दै कुनै पनि महिला प्रसव पीडामा स्वास्थ्य संस्थाको ढोकाबाहिर बस्नुपर्ने अवस्था दोहोरिन नदिने प्रतिबद्धता जनाउनुभयो ।
उहाँले सरकारी अस्पतालमा बिरामीको लामो लाइन र टिकटसम्बन्धी समस्या समाधान गर्न अनलाइन टिकट, टोकन प्रणाली, डिजिटल सेवा तथा फास्ट ट्र्याक विस्तार भइरहेको पनि जानकारी दिनुभयो ।
अस्पतालको सेवा प्रवाहको अनुगमनका लागि मन्त्रालयले ४० सदस्यीय समिति गठन गरेको मन्त्री मेहताले बताउनुभयो । विभिन्न सरकारी अस्पतालमा विस्तारित स्वास्थ्य सेवा (ईएचएस) सञ्चालन भइरहेको र वीर अस्पतालमा समेत ईएचएस सञ्चालनको तयारी भइरहेको उहाँले जानकारी दिनुभयो ।
डिजिटल सेवा र विस्तारित ओपीडीमार्फत बिरामीको चाप तथा प्रतीक्षा समय घटाउँदै सरकारी अस्पतालको सेवा थप सहज बनाउने मन्त्रालयको योजना रहेको मन्त्री मेहताको भनाइ छ ।
