काठमाडौं । अविरल वर्षाका कारण शुक्लागण्डकी नगरपालिका–२ एक्लेखेतमा ताकुडाँडाको खोल्सीबाट आएको बाढीले १३ घरमा सामान्य क्षति पुर्याएको छ ।
जिल्ला प्रहरी कार्यालय तनहुँका अनुसार बाढीको पानी तीनवटा पक्की र १० वटा कच्ची घरमा पसेको थियो । बाढीबाट कुनै मानवीय क्षति भने भएको छैन ।
गएराति खोल्सीमा पानीको बहाव बढेर स्थानीयवासीका घरमा पानी पसेको सूचना प्राप्त भएपछि अस्थायी प्रहरी पोष्ट कोत्रेबाट प्रहरी सहायक निरीक्षक रामचन्द्र पौडेलको नेतृत्वमा प्रहरी टोली घटनास्थल पुगेको थियो ।
जिल्ला प्रहरी कार्यालयका प्रहरी नायब उपरीक्षक द्वारिकाप्रसाद घिमिरेका अनुसार प्रहरीले स्थानीयवासीसँग समन्वय गरी आवश्यक उद्धार तथा सुरक्षा व्यवस्था मिलाएको थियो ।
हाल पानीको बहाव घटिसकेको र अवस्था सामान्य बन्दै गएको प्रहरीले जनाएको छ।
