काठमाडौं । सिंगापुरमा उपचार गराइरहेका प्रधानमन्त्री केपी शर्मा ओलीलाई भेट्न सत्तारुढ नेकपाका महासचिव विष्णु पौडेल त्यसतर्फ जाँदैछन्। मंगलबार दिउँसो साढे १ बजे आफू सिंगापुर जान लागेको पौडेलले बताए।
प्रधानमन्त्री केपी ओलीको स्वास्थ्यस्थिति सुधारोन्मुख भएको छ। मिर्गौलासम्बन्धी विकारयुक्त एन्टिबडी निष्कासन गर्न प्लाज्मा फेरेसिस उपचार विधि अपनाएपछि उनको स्वास्थ्यमा सुधार भइरहेको उपचारमा संलग्न चिकित्सकले बताएका छन्।
प्रधानमन्त्रीका निजी चिकित्सक डा. दिव्या सिंह शाहका अनुसार एन्टिबडीका कारण शरीरमा क्षति निम्तिन सक्ने भएकाले प्लाज्मा फेरेसिस उपचार विधि अपनाइएको हो। ‘शरीरमा बढेको एन्टिबडी निष्कासन गरिएको हो। यसका साथै शरीरमा अरू एन्टिबडी बन्न नदिने हो। एन्टिबडी बढ्दै गएपछि खराबी हुन सक्छ’, डा. शाहले भनिन्।
एन्टिबडी निकालेर मिर्गौलाको कार्यक्षमतामा सुधार ल्याउन कार्यका लागि प्लाज्मा फेरेसिस उपचार विधि अपनाइन्छ। डा। शाहले भनिन्, ‘एन्टिबडीले मिर्गौलालाई खराब गर्न सक्ने भएकाले निष्कासन गर्न उपचार विधि अपनाइएको हो। ५ भदौमा उपचारका लागि सिंगापुर प्रस्थान गरेका प्रधानमन्त्री ओली दुई सातापछि स्वदेश फर्कंदैछन्।
पहिलोपटक उनी नौ दिन उपचार गराएर साउन २७ गते स्वदेश फर्किएका थिए। ओलीको दुवै मिर्गौला फेल भएपछि ०६४ साल साउनमा भारतको एपोलो अस्पतालमा मिर्गौला प्रत्यारोपण गरिएको थियो।
