काठमाडौं । न्युजिल्यान्डले श्रीलंकाविरुद्धको टी–२० क्रिकेट सिरिज एक खेल अघि नै जितेको छ ।
पल्लाकेल अन्तर्राष्ट्रिय क्रिकेट मैदानमा मंगलबार राति भएको खेलमा घरेलु टोली श्रीलंका न्युजिल्यान्डसँग चार विकेटले पराजित भएको हो ।
१६२ रनको चुनौती पछ्याउँदै ब्याटिङ गरेको न्युजिल्यान्डले १९.४ ओभरमा ६ विकेटको क्षतिमा लक्ष्य भेटायो । न्युजिल्यान्डका लागि दुई खेलाडीले अर्धशतक बनाए । कोलिन डि ग्रान्डहमले ५९ रन बनाउँदा टोम ब्रुसले ५३ रन बनाए । बलिङतर्फ अकिला दनन्जयले तीन विकेट लिए ।
यससअघि टस जितेर पहिले ब्याटिङ गरेको श्रीलंकाले निर्धारित २० ओभरमा ९ विकेटको क्षतिमा १६१ रन बनाएको थियो । श्रीलंकाका लागि निरोशान डिकवेल्लाले ३९ र अभिस्का फर्नान्डोले ३७ रन बनाएका थिए ।
यसअघि पहिलो खेलमा पनि श्रीलंकालाई न्युजिल्यान्डले पराजित गरेको थियो ।
