काठमाडौँ । नेकपा (माओवादी केन्द्र) का अध्यक्ष पुष्पकमल दाहाल प्रचण्डले आफूहरुले आफ्नो पार्टीको नभई अन्य पार्टीका प्रमुखलाई प्रधानमन्त्री बनाउनुपर्ने विचित्रको अवस्था आएको बताउनुभएको छ ।
पार्टीको कर्णाली प्रदेश समितिको प्रशिक्षमा शुक्रबार अध्यक्ष प्रचण्डले ‘केपी प्रवृत्ति’ विरुद्ध लड्न नेपाली कांग्रेसका सभापति शेरबहादुर देउवालाई प्रधानमन्त्री बनिदिनुस् भन्ने अवस्था आएको बताउनुभयो ।
प्रतिनिधिसभाको प्रत्यक्षतर्फको निर्वाचनमा नेपाली कांग्रेसले भन्दा बढी सिट आफ्नो पार्टीले जितेको भए पनि देउवाकहाँ गएर आफू र माधव नेपालले ‘तपाइँ प्रधानमन्त्री बनिदिनुस, आवश्यक बहुमत सङ्ख्या हामी पुर्याउँछौँ’ भन्नुपर्ने अवस्था आएको बताउनुभयो । केपी प्रवृत्तिविरुद्ध लड्नका लागि आफ्नो पार्टीले त्यस्तो विचित्रको अवस्था गर्नुपरेको उहाँको भनाइ थियो ।
