मुस्ताङ। भोटेकोशी बाढीबाट (रसुवा-केरुङ) नाका बन्द भएसँगै कोरलानाकाबाट मालवस्तु ढुवानी गर्न थालिएको छ ।
रसुवागढी नाका बन्द हुनुअघि औसत (८-१०)कन्टेनरमा मात्रै आवतजावत गर्ने कोरलानाकामा रसुवागढी बन्द भएपछि मालवस्तु बोक्ने ढुवानीका कन्टेनरहरूको सङ्ख्या बढ्ना थालेको हो ।
सशस्त्र प्रहरी बल ३३ नं गुल्म हेडक्वाटर जोमसोमका अनुसार रसुवाको विनाशकारी बाढीबाट उक्त क्षेत्रको रसुवागढी नाका पूर्ण रूपमा बन्द हुँदा कोरलानाकातर्फ मालवस्तु ढुवानी गर्ने कन्टेनरको सङ्ख्या अप्रत्याशित रूपमा बढेको छ । गुल्मका सशस्त्र प्रहरी नायब उपरीक्षक दीपक कोइरालाका अनुसार भदौ १० देखि १८ गतेको बिहानसम्म (बेनी-जोमसोम-कोरला) सडकमार्ग हुँदै २५२ वटा मालबाहक खाली कन्टेनरहरू कोरलानाकातर्फ प्रस्थान गरिसकेको छ ।
यसैगरी, रसुवागढी नाका बन्दपछि एक सातामा कोरलानाका हुँदै चिनियाँ मालवस्तु बोकेको सत्तरी वटा मालवाहक कन्टेनरहरू मुस्ताङ भन्सार कार्यालयमा जाँचपास भई गन्तव्यतर्फ प्रस्थान गरिसकेका सशस्त्र प्रहरी नायव उपरीक्षक कोइरालाले बताउनुभयो ।
रसुवागढी-केरुङ नाका बन्द भएपछि एकसातामा (नेचुङ-लिजी ) कोरलानाका हुँदै ६१ वटा विद्युतीय सवारीसाधन (इभी) गाडीहरू भन्सार जाँचपास भई गन्तव्यतर्फ प्रस्थान गरिसकेको सशस्त्र प्रहरी नायब उपरीक्षक कोइरालाको भनाइ छ ।
नेपाल–चीन रसुवागढी–केरुङ नाका विनाशकारी बाढीले ध्वस्त भई बन्द भएपछि त्यहाँको नाका प्रयोग गरी नेपाल भित्र्याइने मालवस्तुहरू कोरलानाकातर्फ डाइभर्ट भएका छन् । मुस्ताङ भन्सार प्रमुख विदुर चुडालका अनुसार रसुवा–केरुङबाट भित्रिने मालवस्तु कोरलानाकातर्फ डाइभर्ट भएको भए पनि हालसम्म त्यहाँ डाइभर्ट भइसकेको मालवस्तु कोरलानाकामा आइपुगेको छैन ।
हरितालिका तीज, दसैँ र तिहार जस्ता महत्त्वपूर्ण चाडपर्वहरू नजिकिँदै गरेकाले हाल मुस्ताङ भन्सारमा जाँचपास भइरहेका कन्टेनरहरू नियमित रूपमा कोरलानाकाबाट आउने मालवस्तु कन्टेनर मात्रै भएको भन्सार प्रमुख चुडालले राससलाई जानकारी दिनुभयो ।
“रसुवा–केरुङ नाकाबाट डाइभर्ट भइरहेका मालवस्तुहरू कोरलानाकामा आई पुगिसकेको छैन तर डाइभर्ट गरिएका मालवस्तु ढुवानी गर्न कन्टेनरहरू कोरलानाकातर्फ उक्लिएका छन्,” भन्सार प्रमुख चुडालले भन्नुभयो, “रसुवा-केरुङतर्फबाट आउने मालवस्तु कतिपय डाइभर्ट भइसकेको र कतिपय डाइभर्ट हुने प्रक्रियामा रहेको छ, हामी कहाँ आइपुगेपछि कानुनी प्रक्रिया पूरा गरी आवश्यक भन्सार जाँचपास गरी पठाउँछौँ ।”
रसुवागढी नाका बन्द भएपछि नेपाल–चीन उत्तरी कोरलानाका र लोमान्थाङ–४ न्हेचुङस्थित मुस्ताङ भन्सार कार्यालयको यार्डमा दर्जनौँ मालवाहक कन्टेनरहरू पार्किङ गरी राखिएका छन् । कोरलानाका र भन्सार कार्यालयको यार्डमा दुई सयभन्दा बढी कन्टेनरहरू रोकिएको सशस्त्र प्रहरी बल नेपाल ३३ नं गुल्मले जनाएको छ । रसुवा–केरुङ नाकाबाट डाइभर्ट गरिएका मालवस्तुहरू कोरलानाकासम्म आइनसकेकाले कोरलानाका र भन्सार कार्यालयमा मालवस्तु ढुवानी गर्न पुगेका कन्टेनरहरू यथास्थानमा रोकिएका छन् ।
रसुवागढी–केरुङ नाका र तातोपानी नाका बन्द हुँदा मुस्ताङको कोरलानाका चीनबाट पैठारी गरिने एकमात्रै वैकल्पिक नाका बनेको छ । कोरलास्थित मुस्ताङ भन्सार कार्यालय उत्तरीतर्फ दुईवटा नाका बन्द हुँदा भन्सार कार्यालयको कार्यक्षेत्र र जिम्मेवारी बढेको छ । तर कोरलानाकास्थित मुस्ताङ भन्सार कार्यालयको पर्याप्त भौतिक पूर्वाधार तथा जनशक्ति नहुँदा भन्सार कार्यालयका कार्यसम्पादनमा समस्या र चुनौती देखिएको छ ।
प्रमुख चुडालका अनुसार रसुवा र तातोपानी नाका बन्द भएकाले मुस्ताङ भन्सार कार्यालयलाई व्यवस्थित गर्न जशक्ति थप गर्ने विषयमा विभागमा कुराकानी भइरहेको जानकारी दिनुभयो । कोरलानाकालाई दीर्घकालीन रूपमा बाह्रै महिना सञ्चालन गर्न भन्सार पूर्वाधार, जनशक्ति र सडकको हालको अवस्थालाई थप सुदृढ तुल्याउँदै लैजानुपर्ने बताउनुभयो ।
कोरलानाकालाई वैकल्पिक नाकाका रूपमा सरकारले सञ्चालनमा ल्याएपछि कोरलास्थित मुस्ताङ भन्सार कार्यालय आव २०८२/८३ मा रु छ अर्ब ९२ करोड राजस्व सङ्कलन गरेको थियो ।
चालु आवको पहिलो साउन महिनामा रु २९ करोड राजस्व सङ्कलन गरेको थियो । मुस्ताङ भन्सार कार्यालयमा हाल १८ जनाको दरबन्दी रहेपछि १२ जना मात्रै कर्मचारी कार्यरत रहेको कार्यालय प्रमुख चुडालले जानकारी दिनुभयो । रासस
