काठमाडौं । हालै नेपालमा आएको प्राकृतिक विपद्का कारण भएको जनधनको क्षतिप्रति दुःख व्यक्त गर्दै हिमानी कोषले बाढी प्रभावित समुदायका लागि राहत सामग्री सहयोग गरेको छ।
कोषले २०८३ भदौ ११ गते प्रधानमन्त्री तथा मन्त्रिपरिषद्को कार्यालयमार्फत बाढी प्रभावित स्थानीयका लागि आवश्यक खाद्यान्न तथा विभिन्न राहत सामग्री हस्तान्तरण गरेको हो।
बाढीबाट प्रभावित समुदायको तत्कालीन आवश्यकतालाई मध्यनजर गर्दै कोषले यथाशीघ्र राहत वितरणको कार्य अघि बढाएको जनाएको छ।
हिमानी कोषले आगामी दिनमा पनि राहत वितरणलाई निरन्तरता दिने प्रतिबद्धता जनाएको छ। प्रभावित स्थानीयको आवश्यकता पहिचान गरी सम्बन्धित सरकारी निकायसँग समन्वय गर्दै राहत तथा उद्धार कार्यमा सहयोग गर्ने कोषले जनाएको छ।
कोषले आफ्नो स्रोत र साधनले भ्याएसम्म विपद् प्रभावित नागरिकको उद्धार, राहत तथा पुनःस्थापनाका लागि आवश्यक सहयोग पुर्याउने प्रतिबद्धता समेत व्यक्त गरेको छ।
