काठमाडौँ । नेकपा एमालेका नेता योगेश भट्टराईले भोटेकोशी बाढीबाट उत्पन्न संकटलाई राष्ट्रिय विपत्तिका रूपमा लिएर उद्धार, राहत तथा पुनर्निर्माणका काममा सरकारलाई गम्भीरतापूर्वक अघि बढ्न आग्रह गरेका छन् ।
भट्टराईले आइतबार सामाजिक सञ्जालमार्फत प्रधानमन्त्री बालेन्द्र शाह नेतृत्वको सरकारको ध्यानाकर्षण गराउँदै विपत्तिको सामना गर्न अहंकार, निषेध र प्रतिशोध त्यागेर राष्ट्रिय एकता र सहकार्यको वातावरण बनाउनुपर्ने बताएका हुन् ।
उनले जोखिमपूर्ण उद्धार तथा मुख्य सडक, पुललगायत ठूला संरचनाको निर्माण केन्द्र सरकारले गर्नुपर्ने सुझाव दिएका छन् । त्यसका लागि वैदेशिक सहयोग, आवश्यक जनशक्ति र उपकरण परिचालन गर्नुपर्ने उनको भनाइ छ ।
घाइतेको उद्धार तथा उपचार केन्द्र र प्रदेश सरकारको समन्वयमा स्थानीय तहको सहयोग लिएर गर्नुपर्ने भन्दै भट्टराईले स्वास्थ्य मन्त्रीको संयोजकत्वमा तीन तहका सरकारका प्रतिनिधि सम्मिलित समन्वय समिति गठन गर्न सुझाव दिएका छन् ।
त्यस्तै, वैकल्पिक सडक खोल्ने तथा सञ्चालनमा ल्याउने जिम्मेवारी प्रदेश सरकारलाई दिनुपर्ने र केन्द्र सरकारले आवश्यक प्रविधि तथा जनशक्ति उपलब्ध गराउनुपर्ने उनले बताएका छन् । मृतकको शव पहिचान, दाहसंस्कार तथा व्यवस्थापनमा स्थानीय सरकारको सहयोग लिनुपर्ने उनको सुझाव छ ।
भट्टराईले तत्काल आवश्यक खाद्यान्न, लत्ताकपडा र अस्थायी आवासका सामग्री संकलन तथा अभिलेखीकरणलाई एकीकृत गरी वितरणको जिम्मेवारी स्थानीय सरकारलाई दिनुपर्ने बताएका छन् ।
उनले सार्वजनिक तथा निजी भौतिक सम्पत्तिमा भएको क्षतिको यथार्थ विवरण तत्काल संकलन गरी २०७२ सालको भूकम्पपछिको पुनर्निर्माणको अवधारणाअनुसार दुई वर्षभित्र पुनर्निर्माण सम्पन्न गर्नुपर्नेमा जोड दिएका छन् । पुनर्निर्माणमा तीनै तहका सरकारलाई एकीकृत रूपमा परिचालन गर्नुपर्ने उनको भनाइ छ ।
त्यसैगरी, देशभित्र र बाहिरबाट सहयोग आह्वान गर्ने गरी पुनर्निर्माण कोष स्थापना गर्नुपर्ने र कानुन तथा कार्यविधि बनाएर उक्त कोषलाई पीडितको जीविकोपार्जन, शिक्षा, स्वास्थ्य तथा रोजगारीका साथै निजी क्षेत्रबाट निर्माणाधीन तथा सञ्चालित जलविद्युत् आयोजना र अन्य उद्योग–व्यवसाय पुनः सञ्चालनमा परिचालन गर्नुपर्ने भट्टराईले बताएका छन् ।
भट्टराईले प्रधानमन्त्रीको अध्यक्षतामा सर्वदलीय संयन्त्र गठन गरी उद्धार, राहत तथा पुनर्निर्माणका कामको अनुगमन गर्नसमेत सरकारसँग आग्रह गरेका छन् ।
‘यो महासंकट हो, महाविपत्ति हो । सिंगो राष्ट्रले एकता प्रदर्शन गर्ने बेला हो,’ भट्टराईले लेखेका छन् । उनले प्रधानमन्त्री शाहलाई आह्वान र नेतृत्व गर्दै आफ्नो पद र ऐतिहासिक जिम्मेवारी पूरा गर्न अनुरोधसमेत गरेका छन्।
