काठमाडौं । सम्भावित विपद् तथा आपत्कालीन अवस्थालाई मध्यनजर गर्दै स्वास्थ्य तथा खाद्य स्वच्छता मन्त्रालयले स्वास्थ्य आपत्कालीन कार्यसञ्चालन केन्द्र (HEOC) सक्रिय बनाएको छ।
मन्त्रालयका अनुसार आपत्कालीन स्वास्थ्य सेवा तथा उद्धार व्यवस्थापनका लागि नेपाल रेडक्रस सोसाइटी, लायन्स क्लब, नेपाल स्काउट, बागमती तथा गण्डकी प्रदेशका स्वास्थ्य मन्त्रालय, काठमाडौँस्थित संघीय अस्पताल तथा रक्तसञ्चार केन्द्रहरूसँग आवश्यक समन्वय भइरहेको छ।
सम्भावित विपद्बाट घाइते तथा प्रभावित हुने बिरामीको उपचार व्यवस्थापनलाई सहज बनाउन काठमाडौँका अस्पतालमा उपलब्ध तथा खाली बेडको विवरण अद्यावधिक गरिएको मन्त्रालयले जनाएको छ। आवश्यकताअनुसार बिरामी व्यवस्थापन गर्न अस्पतालहरूलाई तयारी अवस्थामा राखिएको छ।
त्यसैगरी, उद्धार तथा उपचारका लागि आवश्यक एम्बुलेन्स र स्वास्थ्य सेवासम्बन्धी उपकरण तथा साधनहरूलाई समेत स्ट्यान्डबाइमा राखिएको मन्त्रालयले जनाएको छ।
मन्त्रालयले आपत्कालीन स्वास्थ्यसम्बन्धी सहयोग, सूचना तथा समन्वय आवश्यक परे हेल्पलाइन नम्बर १११५ मा सम्पर्क गर्न सर्वसाधारणलाई अनुरोध गरेको छ।
