काठमाडौं । रसुवामा तिब्बततर्फबाट भोटेकोशी नदीमा ठूलो बाढी प्रवेश गरेपछि राष्ट्रिय विपद् जोखिम न्यूनीकरण तथा व्यवस्थापन प्राधिकरणले भोटेकोशी, त्रिशूली र नारायणी नदीको तटीय क्षेत्रमा उच्च सतर्कता अपनाउन आग्रह गरेको छ।
प्राधिकरणले बुधबार विशेष सूचना जारी गर्दै अर्को सूचना नआएसम्म नदी तटीय क्षेत्रमा रहेका नागरिकलाई उच्च सतर्कता अपनाउन तथा जोखिमयुक्त स्थानबाट सुरक्षित ठाउँमा जान आग्रह गरेको हो।
प्राधिकरणका अनुसार रसुवा, धादिङ, नुवाकोट, गोरखा, चितवन र तनहुँका नदी तटीय क्षेत्रमा बसोबास गर्ने परिवारलाई सुरक्षित स्थानमा जान अनुरोध गरिएको छ। खोज तथा उद्धार वा कुनै सहायता आवश्यक परे टोल फ्री नम्बर १००, १२३४ र १११४ मा सम्पर्क गर्न सकिने जनाइएको छ।
बाढीको जोखिमलाई ध्यानमा राख्दै पृथ्वी राजमार्ग, गल्छी–नुवाकोट–रसुवा स्याफ्रुबेँसी सडक तथा मुग्लिङ–नारायणगढ सडकमा यात्रा नगर्न पनि प्राधिकरणले आग्रह गरेको छ। ती सडकमा आवतजावत पूर्ण रूपमा रोक्न स्थानीय तह तथा प्रशासनलाई समेत अनुरोध गरिएको छ।
विपद्पछिको खोज, उद्धार तथा राहत कार्यमा समन्वय, सहयोग र सहजीकरण गर्न सम्बन्धित सबै पक्षलाई प्राधिकरणले अपिल गरेको छ।
प्राधिकरणका प्रवक्ता शान्ति महतले बुधबार (२०८३ भदौ १० गते) जारी गरेको सूचनामार्फत यस्तो आग्रह गरिएको हो।
