काठमाडौं । रसुवामा भोटेकोशी नदीमा ठूलो बाढी आएपछि गृह मन्त्रालयले पाँच जिल्लाका नदी तटीय क्षेत्रमा उच्च सतर्कता अपनाउन आग्रह गरेको छ।
गृह मन्त्रालयले सूचना जारी गर्दै भोटेकोशी र त्रिशूली नदीको तटीय क्षेत्रमा उच्च सतर्कता अपनाउन आग्रह गरेको हो। मन्त्रालयले रसुवा, धादिङ, गोरखा, चितवन र नुवाकोटका नदी तटीय क्षेत्रमा बसोबास गर्ने परिवारलाई सुरक्षित स्थानमा रहन अनुरोध गरेको छ।
खोज तथा उद्धार आवश्यक भएमा वा कुनै सहायता गर्नुपर्ने अवस्था देखिएमा गृह मन्त्रालयले टोल फ्री नम्बर १२३४ मा तत्काल सम्पर्क गर्न आग्रह गरेको छ।
यसैबीच, गृहमन्त्री सुधन गुरुङले बाढीको जोखिमलाई मध्यनजर गर्दै पृथ्वी राजमार्ग, गल्छी–नुवाकोट–रसुवा–स्याफ्रुबेँसी सडक तथा मुग्लिङ–नारायणगढ सडकमा यात्रा नगर्न र नगराउन आग्रह गरेका छन्। उनले जोखिमयुक्त क्षेत्रमा आवतजावतमा पूर्ण रोक लगाउनसमेत सम्बन्धित निकायलाई आग्रह गरेका छन्।
भोटेकोशी नदीमा आएको बाढीका कारण रसुवाको विभिन्न क्षेत्रमा क्षति पुगेको खबर आएपछि सरकारले सुरक्षा तथा उद्धार संयन्त्रलाई उच्च सतर्कतामा राखेको छ।
