काठमाडाैँ । नेपाल कम्युनिष्ट पार्टी (एमाले)ले गण्डकी प्रदेश सरकारबाट आफ्ना मन्त्री फिर्ता बोलाउने निर्णय गरेको छ।
आज बसेको एमाले संसदीय दलको बोर्ड बैठकले प्रदेश सरकारबाट मन्त्री फिर्ता बोलाउने निर्णय गरेको संसदीय दलका उपनेता लिलबहादुर थापा मगरले जानकारी दिनुभयो।
उहाँका अनुसार एमालेका मन्त्रीहरूले राजीनामा बुझाउने तयारी भइरहेको छ। नयाँ राजनीतिक परिस्थितिमा कसरी अघि बढ्ने भन्ने विषयमा एमालेले नेपाली कम्युनिष्ट पार्टीलगायत अन्य दलसँग संवाद सुरु गर्ने भएको छ।
अन्य प्रदेशमा एमाले र नेकपाबीच सत्ता सहकार्य सुरु भइसकेको अवस्थामा गण्डकी प्रदेशमा पनि दुई दल मिलेर नयाँ सरकार निर्माणका लागि पहल अघि बढाइने थापा मगरले बताउनुभयो।
हाल नेपाली कांग्रेस नेतृत्वको गण्डकी प्रदेश सरकारमा एमालेबाट गोविन्दबहादुर नेपाली भौतिक पूर्वाधार विकास तथा यातायात व्यवस्थामन्त्री, भीम कार्की भूमि व्यवस्था, कृषि तथा सहकारीमन्त्री, यशोदा रिमाल उद्योग तथा पर्यटनमन्त्री र लक्ष्मण पाण्डे स्वास्थ्य मन्त्रीका रूपमा कार्यरत हुनुहुन्छ।
गत वैशाख २ गते भएको मन्त्रिपरिषद् हेरफेरका क्रममा उहाँहरूले मन्त्रीको जिम्मेवारी सम्हाल्नुभएको थियो।
