काठमाडौं । नेपाली कांग्रेसकी सांसद पार्वता डिसी चौधरीले एनसेलकको कर विवादसम्बन्धी भदौ ९ गतेको फैसला गर्ने न्यायाधीशमाथि महाभियोग लगाउनुपर्ने बताएकी छन् । ‘५ जना न्यायाधीशको इजलासले एनसेलको पक्षमा गरेको निर्णय गर्यो, त्यो राष्ट्रघात निर्णय हो’ उनले भनिन् ।
मंगलबार प्रतिनिधिसभाको विशेष समयमा बोल्दै उनले सर्वोच्चको उक्त पैसला राष्ट्रघात हो भन्दै त्यसमा संलग्न न्यायाधीशविरुद्ध महाभियोग प्रस्ताव दर्ता गर्नुपर्ने बताएकी हुन् । सर्वोच्च अदालतले एनसेल कर विवादसम्बन्धी एक रीटमाथि सुनुवाई गर्दै ठूला करदाता कार्यालयले तोकेको करमध्ये आयकर ऐनको धारा १२० (क) अनुसारको कर खारेज गर्ने फैसला सुनाएको थियो ।
उनले ती न्यायाधीशविरुद्ध महाभियोग दर्ता गर्न सत्तारुढ दल नेकपालाई आग्रह गरिन् । सांसद चौधरीले न्यायपालिकामा चलखेल हुने गरेको र आम जनतालाई न्यायपालिकाप्रति विश्वास हराउँदै गएको बताइन् ।
