विराटनगर । प्रदेश १ का आन्तरिक मामिला तथा कानुन मन्त्रालयले प्रमुख जिल्ला अधिकारीसँग भिडियो संवाद गर्न सकिने व्यवस्था मिलाएको छ । कार्यक्रमको शुभारम्भ गर्दै संवादमार्फत आन्तरिक मामिला तथा कानुनमन्त्री हिक्मत कार्कीले प्रजिअबाट सबै जिल्लाका गतिविधिको जानकारी लिएका हुन् ।
१४ वटै जिल्लाका प्रजिअसँग मन्त्री कार्कीले संविधान दिवसलाई सिर्जनात्मक र विशेष ढंगबाट प्रदेश भरीका एक सय ३७ वटै स्थानीय तहमा मनाइने भएकाले त्यसै अनुसार तयारीमा लाग्न प्रजिअलाई निर्देशन दिएका छन् । जिल्लामा डेंगुबाट प्रभावित भएकाको संख्या, उनीहरुको उपचारका लागि मिलाइएको व्यवस्था र बिरामीको अवस्थाका बारेमा बुझेर जानकारी गराउन प्रजिअलाई उनको निर्देशन छ ।
प्रदेशका प्रजिअसँग समन्वयका लागि मन्त्रालयले सञ्चालनमा ल्याएको कार्यक्रमबाट प्रत्यक्ष भिडियो संवाद गर्न सकिने र कुनै विशेष अवस्थामा सामूहिक संवाद गरेर अवस्थाका बारेमा जानकारी लिँदै तत्काल पहल एवं आवश्यक सहयोग गरिने बताइएको छ । यसले विपद् तथा प्रकोप व्यवस्थापन र नियन्त्रणका लागि प्रदेश सरकारसँग प्रमुख जिल्ला अधिकारीले गर्ने समन्वयमा सहजीकरण हुने दाबी मन्त्रालयको छ ।
प्रदेश १ मा झापा, इलाम, ताप्लेजुङ, पाँचथर, मोरङ, सुनसरी, धनकुटा, तेह्रथुम, संखुवासभा, भोजपुर, उदयपुर, खोटाङ, ओखलढुंगा र सोलुखुम्बु जिल्ला छन् ।
