काठमाडौ । जोरपाटीस्थित नामी इन्टरनेशनल स्कुलले कक्षा ११ मा नयाँ भर्ना भएका विद्यार्थीहरुलाई स्वागत कार्यक्रमको आयोजना गरेको छ । काठमाडौँको कमलादीस्थित एकेडेमी हलमा सो कार्यक्रमको आयोजना गरिएको हो ।
विविध कार्यक्रमहरु सञ्चालन गरी कक्षा १२ का विद्यार्थीहरूले स्कुलमा भर्ना भएका नव आगन्तुक विद्यार्थीहरुलाई संगीत, नृत्य, नाटक तथा विभिन्न मनोरञ्जनात्मक प्रस्तुतिहरूमार्फत स्वागत गरिएको थियो । विभिन्न नृत्यहरु प्रस्तुतिसँगै हास्यब्यङ्गय तथा आपसी अन्तरक्रियाले कार्यक्रमलाई थप आकर्षक बनाएको थियो ।
समारोहमा नामी स्कुलले २०८३ सालको राष्ट्रिय परिक्षा बोर्डको बोर्ड परीक्षामा उत्कृष्ट नतिजा ल्याउन सफल कक्षा १२ का विद्यार्थीहरूलाई सम्मान गरेको थियो । कार्यक्रममा नामी इन्टरनेशनल स्कुलले विद्यार्थीहरूको मेहनत र सफलताको प्रशंसा गर्दै उनीहरूको उपलब्धिमा विद्यालय नेतृत्व, शिक्षक–शिक्षिका, संयोजक, कर्मचारी तथा अभिभावकहरूको योगदानलाई पनि स्मरण गरिएको थियो ।
कार्यक्रममा विद्यालयकी प्रिन्सिपल अनिशा पाण्डेले नयाँ विद्यार्थीहरूलाई सम्बोधन गर्दै नामीमा बिताउने दुई वर्षलाई अधिकतम उपयोग गर्न, आफ्नो रुचि पहिचान गर्न, नयाँ अवसरमा सहभागी हुन, आफ्नो क्षमता खोज्न र सिकाइको यात्रालाई रमाइलो बनाउन प्रेरित गर्नुभयो । उहाँले विद्यार्थीहरूलाई आफ्नै लक्ष्य निर्धारण गर्दै आफ्नो यात्रा आफैं निर्माण गर्न आग्रह गर्दै भन्नुभयो, “आफ्नो यात्रा आफैं निर्माण गर्नुहोस् र यी दुई वर्षलाई आफ्नै तरिकाले अर्थपूर्ण बनाउनुहोस् ।”
नामी स्कुलमा कक्षा ११ मा हालसम्म ३ हजार भन्दा बढी विद्यार्थी भर्ना भइसकेका छन् । जसमध्ये धेरैले नेपाल तथा विदेशका विभिन्न विश्वविद्यालय र कलेजहरूमा उच्च शिक्षा हासिल गर्दै आएका छन् ।
नामी इन्टरनेशनल स्कुलले नेपालमा गुणस्तरीय, व्यावहारिक र विद्यार्थी–केन्द्रित शिक्षाको विकासमा निरन्तर योगदान गर्दै आएको छ । शैक्षिक उत्कृष्टतासँगै प्रविधि, अनुसन्धान, सिर्जनशीलता, उद्यमशीलता, अतिरिक्त तथा सह–पाठ्यक्रम गतिविधिलाई जोड दिँदै नामीले विद्यार्थीहरूलाई बदलिँदो विश्वका लागि आवश्यक ज्ञान, सीप र आत्मविश्वास विकास गर्ने अवसर प्रदान गर्दै आएको छ ।
नेपाल तथा विदेशमा उच्च शिक्षाका लागि विद्यार्थीहरूलाई तयार पार्दै नामीले आधुनिक शिक्षण अभ्यास र विश्वव्यापी अवसरलाई नेपाली शिक्षा प्रणालीसँग जोड्ने प्रयास स्कुलले गरिरहेको छ ।
समारोहमा नामीका सञ्चालक समितिका सदस्यहरू, प्रमुख कार्यकारी अधिकृत, वरिष्ठ व्यवस्थापक, विभागीय प्रमुखहरू, संयोजकहरू, शिक्षक–शिक्षिका, कर्मचारी तथा विद्यालयमा अध्ययनरत कक्षा ११ र १२ का विद्यार्थीहरूको सहभागिता रहेको थियो ।
