ललितपुर: नाडा अटोमोबाइल एशोसिएशन अफ नेपालले आफ्नो स्थापनाको ५० औं वर्ष (स्वर्ण जयन्ती) को अवसरमा १८ औं संस्करणको ‘नाडा अटो शो २०२४’ आयोजना गर्ने भएको छ ।
सोमवार ललितपुरमा आयोजित एक पत्रकार सम्मेलनमार्फत संस्थाले उक्त प्रदर्शनी आगामी भदौ ९ देखि १४ गतेसम्म काठमाडौंको भृकुटीमण्डप प्रदर्शनी स्थलमा सञ्चालन हुने जानकारी दिएको हो । एचपी लुब्रिकेन्ट्स मुख्य प्रायोजक रहेको यस मेलाले नेपालको अटोमोबाइल क्षेत्रको वर्तमान अवस्था, आधुनिक प्रविधि र व्यावसायिक सम्भावनालाई एउटै मञ्चमा प्रश्तुत गर्ने उद्देश्य राखेको छ । पत्रकार सम्मेलनमा बोल्दै नाडाका अध्यक्ष सुरेन्द्रकुमार उप्रेतीले नाडाले विगत ५ दशकदेखि नेपालको आर्थिक र औद्योगिक विकासमा नेतृत्वदायी भुमिका निर्वाह गर्दै आएको बताउनु भयो । उहाँले यस वर्षको अटो शो केवल सवारी साधनको प्रदर्शनी मात्र नभई नेपालको अटोमोबाइल क्षेत्र आत्मनिर्भरतातर्फ उन्मुख भएको सन्देश दिने माध्यम बन्ने बताउनु भयो ।
मेलाका बारेमा विस्तृत जानकारी दिँदै १८ औं नाडा अटो शो समितिका सभापति अनुपकुमार बरालले यस पटकको प्रदर्शनी करिव ३ लाख स्क्वायर फिट क्षेत्रफलमा फैलिने र २०० भन्दा बढी स्टलहरू रहने जानकारी दिनुभयो। प्रदर्शनीमा २३ वटा ब्राण्डका प्यासेन्जर कार, १७ वटा ब्राण्डका लाइट कमर्सियल भेइकल, १३ वटा ब्राण्डका दुईपांग्रे र १० वटा वित्तीय एवं बीमा कम्पनीहरूको सहभागिता रहनेछ । त्यसैगरी, ७० वटा स्टलहरू अटोमोटिभ पार्टपुर्जा, टायर, लुब्रिकेन्ट्स र ग्यारेज उपकरणका लागि छुट्याइएका छन् ।
अध्यक्ष उप्रेतीले भन्नुभयो, ‘विद्युतीय सवारी साधन (ईभी) को बढ्दो प्रयोग र आधुनिक प्रविधिसँगै नेपालमै सवारी साधन एसेम्बल हुने क्रम शुरु हुनु सुखद् पक्ष हो । यस प्रदर्शनीले शिथिल बनेको बजारलाई चलायमान बनाउन सहयोग पु¥याउनेछ ।’
यस पटकको प्रदर्शनीमा ‘मेड इन नेपाल’ र ‘मेड फर नेपाल’ प्याभिलियन विशेष आकर्षणको रूपमा रहनेछ । जहाँ नेपालमै उत्पादन तथा एसेम्बल भएका सवारी साधनहरू (यात्री, सिप्रदी लगायत), टायर, लुब्रिकेन्ट्स, ब्याट्री र हेल्मेटहरूको प्रदर्शनी गरिनेछ । यसका साथै भविष्यको प्रविधिलाई झल्काउन जीआई ह्युमनोइड रोबोट र जीओ–२ क्वाड्रप्ट रोबोटको प्रदर्शन समेत गरिने आयोजकले जनाएको छ । मेला अवधिभर स्मार्ट मोबिलिटी र दिगो विकासका विषयमा केन्द्रित रहेर ‘सिम्पोजियम’ (छलफल कार्यक्रम) समेत आयोजना गरिनेछ ।
प्रदर्शनीलाई व्यवस्थित बनाउन दुईपांग्रे, चारपांग्रे र पार्टपुर्जाहरूका लागि छुट्टाछुट्टै जोनको व्यवस्था गरिएको छ । अवलोकनकर्ताहरूको सहजताका लागि ‘खल्ती’ एपमार्फत अग्रिम टिकट बुकिङको व्यवस्था मिलाइएको छ भने नेपाल पुलिस क्लव र नेसनल ट्रेडिङको परिसरमा पार्किङको प्रवन्ध गरी त्यहाँबाट प्रदर्शनी स्थलसम्म ‘सटल बस’ सेवा उपलब्ध गराइनेछ । मेलामा सुरक्षाका लागि सीसीटीभी निगरानी, अग्नि नियन्त्रण उपकरण र आपतकालीन स्वास्थ्य टोलीको व्यवस्था गरिएको छ । साथै, प्रदर्शनी स्थललाई अपाङ्गमैत्री समेत बनाइएको छ । ६ दिनसम्म चल्ने यस भव्य मेलामा करिव २ लाख आगन्तुकहरूले अवलोकन गर्ने लक्ष्य नाडाले लिएको छ । –न्युज एजेन्सी नेपाल
