ललितपुर; नेपाली काँग्रेसका सभापति गगनकुमार थापाले राजनीतिक दलभित्रको आन्तरिक शक्ति सङ्घर्षमा अदालत प्रवेश गर्न नहुने बताउनुभएको छ ।
सोमवार ललितपुरको सानेपास्थित पार्टी केन्द्रिय कार्यालयमा जारी केन्द्रिय कार्यसमितिको बैठकमा बोल्दै उहाँले यस्तो बताउनुभएको हो । सभापति थापाले अदालतको क्षेत्राधिकार संविधान र कानूनको पालना भए-नभएको व्याख्या गर्नेमा मात्र सिमित हुनुपर्ने उल्लेख गर्दै दलका आन्तरिक विषयमा न्यायपालिकाले संयमता अपनाउनुपर्नेमा जोड दिनुभयो ।
दलका आन्तरिक कुराहरूमा प्रवेश गर्नु न्यायिक संयमताको विषय नभइ यसले जनभावनाको कदर पनि नगर्ने बताउनु भयो । राजनीतिक दलहरू सार्वजनिक संस्था भएको स्पष्ट पार्दै थापाले अदालतले आफ्नो संस्थागत छवि र जनभावनालाई विशेष ख्याल गर्नेमा आफू विश्वस्त रहेको बताउनु भयो । उहाँले विशेष महाधिवेशनबाट निर्वाचित नेतृत्व, प्रचलित कानूनबमोजिम सम्पन्न निर्वाचन र त्यसबाट गठित प्रतिनिधि सभाले गरेका दर्जनौँ कानून निर्माणका कार्यलाई अदालतले वस्तुपरक रूपमा हेर्नुपर्ने तर्क गर्नुभयो ।
सभापति थापाले भन्नुभयो, ‘दलभित्रको आन्तरिक शक्ति सङ्घर्षका विषयमा अदालत प्रवेश गर्दैन । अदालतले संविधान र कानुनअनुसार प्रक्रिया भएको छ कि छैन भन्ने विषय मात्र हेर्ने हो, र त्यो हेरिसकेको छ । बाँकी विषयहरू दलका आन्तरिक विषय हुन् । दलका आन्तरिक मामिलामा अदालत प्रवेश गर्नु न्यायिक संयमताको दृष्टिले उचित हुँदैन । पार्टी सार्वजनिक संस्था पनि भएकाले अदालतले आफ्नो संस्थागत गरिमा र जनभावनालाई समेत ध्यानमा राख्नेछ भन्ने मेरो विश्वास छ । विशेष महाधिवेशनबाट आएको नेतृत्व, प्रचलित कानूनबमोजिम सम्पन्न निर्वाचन र त्यसबाट बनेको प्रतिनिधिसभाले दर्जनौँ कानून पारित गरिसकेको वर्तमान अवस्थालाई समेत सम्मानित अदालतले विचार गर्नेछ । हिजो सत्य जे थियो, आज पनि सत्य त्यही हो भन्ने आधारमा अदालतले निर्णय गर्नेछ भन्नेमा मलाई कुनै शंका छैन । यो विश्वास पार्टीका साथीहरूले पनि व्यक्त गर्नुभएको छ ।’
देशले कानूनी र राजनीतिक रूपमा एउटा निश्चित बाटो तय गरिसकेको सन्दर्भमा सम्मानित अदालतले सत्य र यथार्थलाई आत्मसात गर्नेमा आफू र आफ्नो पार्टी पूर्णतः विश्वस्त रहेको उहाँले उल्लेख गर्नुभयो । सत्य हिजो जे थियो, आज पनि त्यही रहन्छ भन्ने आधारमा नै अदालतले निर्णय गर्नेमा आफू स्पष्ट रहेको बताउनु भयो । –न्युज एजेन्सी नेपाल
तस्बिरः गोपाल दाहाल/रासस
