काठमाडौँ। नेपाली काँग्रेसका नेता नारायणप्रकाश साउदले पार्टीभित्रको आन्तरिक एकताका लागि १४ औँ महाधिवेशनबाट निर्वाचित कार्यसमितिको वैधानिकता अनिवार्य रहेको बताउनुभएको छ ।
संस्थापन इतर पक्षद्वारा आयोजित राष्ट्रिय भेलालाई सम्बोधन गर्दै नेता साउदले पार्टी अहिले गम्भीर चुनौती र संकटको अवस्थामा रहेकाले सबै पक्ष एकजुट हुनुपर्नेमा जोड दिनुभएको हो ।
नेता साउदले पार्टी पूर्व सभापति शेरबहादुर देउवाका तर्फबाट विगतमा पनि एकताका लागि पहल भएको र भविष्यमा पनि त्यसलाई निरन्तरता दिइने विश्वास व्यक्त गर्नुभयो ।
उहाँले पार्टी संकटमा रहेको समयमा आन्तरिक विग्रह बढाउने गरी विशेष अधिवेशनको माग गर्ने र दस्तखत अभियान चलाउने कार्यले संगठनलाई क्षति पु¥याएको दाबी गर्नुभयो ।
निर्वाचनको परिणाम र युवा नेतृत्वको दाबीबारे टिप्पणी गर्दै साउदले गत निर्वाचनमा काँग्रेसको मत संख्या २७ लाखबाट १६ लाखमा झर्नु र ८९ सिटबाट ३८ सिटमा खुम्चिनु दुःखद् रहेको बताउनु भयो । उहाँले लोकप्रिय भनिएका र फेस बिक्छ भन्ने दाबी गर्ने युवा नेताहरूको प्रभाव निर्वाचन परिणामले एक मिथक मात्रै प्रमाणित गरिदिएको टिप्पणी गर्नुभयो ।
उहाँले भन्नुभयो, ‘हामीले साथीहरूलाई पटक–पटक आग्रह गरेका थियौँ कि पार्टी र मुलुक संकटमा भएको बेला आन्तरिक विरोधमा नलाग्नुहोस् । नियमित महाधिवेशनको समय नजिकिँदै गर्दा पदको लोभ र महत्वाकांक्षाले केही साथीहरू अन्धो हुनुभयो, जसले गर्दा पार्टीको पीडालाई बुझ्न सकिएन । जुनसुकै परिस्थिति आए पनि जबसम्म १४ औँ महाधिवेशनको समितिलाई पुनस्र्थापित गरिन्न, तबसम्म काँग्रेसको एकता हुन सक्दैन । किनभने उक्त महाधिवेशन मात्रै यस्तो थलो थियो जहाँ सबै पक्षको सहभागितामा कार्यसमिति चुनिएको थियो । आधा मान्छेले गरेको निर्णय सर्वसम्मत हुन सक्दैन ।’
पार्टीभित्रको कानूनी विवादबारे चर्चा गर्दै उहाँले सर्वोच्च अदालतमा विचाराधीन पुनरावलोकनको मुद्दा नै एकताको मुख्य आधार हुने स्पष्ट पार्नुभयो । –न्युज एजेन्सी नेपाल
