काठमाडौँ। नेपाली काँग्रेसका नेता रमेश लेखकले पार्टीभित्रको वर्तमान वैचारिक तथा संगठनात्मक मतभेदलाई अन्त्य गर्दै काँग्रेसलाई एकतावद्ध बनाउन पूर्वप्रधानमन्त्री शेरबहादुर देउवाको भुमिका निर्णायक हुने बताउनुभएको छ ।
पार्टीको संस्थापन इतर समूहद्वारा आयोजित राष्ट्रिय भेलालाई सम्बोधन गर्दै उहाँले यस्तो बताउनुभएको हो । नेता लेखकले देशको वर्तमान परिस्थिति जटिल रहेको उल्लेख गर्दै यस्तो अवस्थामा लोकतन्त्र र राष्ट्रिय एजेण्डाहरूलाई सम्बोधन गर्न काँग्रेस अनुशासित र सुसंगठित हुनुपर्नेमा जोड दिनुभयो
। पार्टीभित्र देखिएको पछिल्लो विवादको मुख्य कारण विशेष महाधिवेशनको माग र त्यसले निम्त्याएको कार्यविधि रहेको उहाँको विश्लेषण छ । लेखकले नियमित महाधिवेशनमार्फत नेतृत्व हस्तान्तरणको प्रक्रिया स्वाभाविक हुने भएपनि बीचैमा विशेष महाधिवेशनको बाटो रोज्दा पार्टीमा द्वन्द्वको बीजारोपण भएको दाबी गर्नुभयो ।
उहाँले भन्नुभयो, ‘आज नेपाली काँग्रेस मानसिक र संगठनात्मक रूपमा विभाजित हुनसक्ने जटिल मोडमा उभिएको छ । सभापति देउवाको स्वदेश फिर्तीसँगै पार्टीलाई एकताबद्ध गर्ने र देशका महत्वपूर्ण विषयहरूमा ठोस निर्णय लिने वातावरण बन्नेमा हामी विश्वस्त छौँ । निश्चित अवधि पुगेपछि हुने स्वाभाविक प्रक्रियालाई छाडेर शल्यक्रियामार्फत समयअगावै सन्तान प्राप्तिको प्रयास गर्दा त्यसले आमा र सन्तान दुवैको स्वास्थ्यमा प्रतिकूल प्रभाव पारेजस्तै पार्टीमा पनि विशेष महाधिवेशनले समस्या सिर्जना गरेको छ । यो एउटा अप्राकृतिक र अस्वभाविक कदम सावित भएको छ ।’
नेता लेखकले भएका त्रुटिहरूलाई सच्याउँदै १४ औँ महाधिवेशनको निरन्तरता र १५ औँ महाधिवेशनको तयारीका पक्षधरहरूबीच समन्वय हुनुपर्ने बताउनु भयो । –न्युज एजेन्सी नेपाल
