काठमाडौं । कृषि, वन तथा पर्यावरणमन्त्री गीता चौधरीले जलवायु परिवर्तनका चुनौती सामना गर्न तथा नीति निर्माणमा युवाहरूको सार्थक सहभागिता सुनिश्चित गर्न सरकार प्रतिबद्ध रहेको बताउनुभएको छ ।
काठमाडौंमा शुक्रबारदेखि सुरु भएको तीन दिने ‘लोकल कन्फरेन्स अफ युथ’ (एलसीओवाई)को उद्घाटन गर्दै मन्त्री चौधरीले जलवायु परिवर्तनका क्षेत्रमा युवाको भूमिका महत्वपूर्ण रहेको बताउनुभयो । उहाँले सम्मेलनबाट प्राप्त निष्कर्ष र सुझावले आगामी दिनमा जलवायु नीति तर्जुमा तथा कार्यान्वयनमा महत्वपूर्ण मार्गदर्शन गर्ने विश्वास व्यक्त गर्नुभयो ।
मन्त्री चौधरीले नेपालको जलवायु परिवर्तनमा योगदान न्यून भए पनि भौगोलिक संवेदनशीलताका कारण नेपाल जलवायु जोखिमका दृष्टिले विश्वकै अति संवेदनशील मुलुकमध्ये रहेको उल्लेख गर्नुभयो । सम्मेलनबाट आउने निष्कर्षलाई आगामी कोप–३१ लगायत अन्तर्राष्ट्रिय मञ्चमा नेपालको साझा आवाजका रूपमा प्रस्तुत गर्ने प्रतिबद्धता पनि उहाँले जनाउनुभयो ।
वर्तमान सरकारमा युवाहरूको उल्लेख्य प्रतिनिधित्व रहेको चर्चा गर्दै मन्त्री चौधरीले युवाका लागि आफ्नो क्षमता प्रदर्शन गर्दै नीतिगत तहमा हस्तक्षेप गर्ने महत्वपूर्ण अवसर रहेको बताउनुभयो ।
सरकारले जलवायु परिवर्तनसँग सम्बन्धित सूचना तथा तथ्याङ्क समुदाय र युवासम्म सहज रूपमा पुर्याउन डिजिटलाइजेसनको प्रक्रिया अघि बढाएको उहाँले जानकारी दिनुभयो । सामाजिक सञ्जालमार्फत जलवायु पूर्वानुमान र जनचेतना फैलाउने काम भइरहेको भन्दै उहाँले जलवायु वित्तलाई पारदर्शी र पहुँचयोग्य बनाउन सरकार प्रतिबद्ध रहेको स्पष्ट पार्नुभयो ।
नीति निर्माणमा नवीनता, विज्ञान र स्थानीय ज्ञानलाई समुदायको वास्तविक अनुभवसँग जोड्नुपर्नेमा उहाँले जोड दिनुभयो । राष्ट्रिय रूपमा निर्धारित योगदान (एनडीसी ३.०) को तयारी भइरहेको उल्लेख गर्दै मन्त्री चौधरीले जलवायु तथा वातावरणसम्बन्धी कानूनलाई दराजमा थन्क्याएर नराखी प्रभावकारी कार्यान्वयनमा लैजाने सरकारको योजना रहेको बताउनुभयो ।
उहाँले हिमाली क्षेत्रमा हिउँ तीव्र गतिमा पग्लिरहेको, पहाडी क्षेत्रमा भूक्षय र पहिरो बढिरहेको तथा तराईमा बाढी, डुबान र अनिश्चित खडेरीजस्ता समस्या देखिएको बताउनुभयो । यस्ता समस्याले कृषि प्रणाली, जैविक विविधता तथा नागरिकको जीविकोपार्जनमा गम्भीर जोखिम सिर्जना गरेको उहाँको भनाइ छ ।
‘विगतमा हामीले सडकबाट युवाका मुद्दा उठाएका थियौँ, अब ती आवाजलाई नीति र कानूनमा रूपान्तरण गर्ने बेला आएको छ,’ मन्त्री चौधरीले भन्नुभयो, ‘सरकारले यस वर्षलाई कानून परिमार्जन र निर्माणको वर्षका रूपमा अघि बढाएकाले जलवायु र वातावरणसँग सम्बन्धित कानूनमा युवाका नवीन सोचलाई समेट्न हामी तयार छौँ ।’
मन्त्री चौधरीले सम्मेलनका आयोजक तथा सहभागीलाई सम्मेलनको निष्कर्षसहित मन्त्रालयमा आएर विस्तृत छलफल गर्नसमेत आह्वान गर्नुभयो ।
तीन दिनसम्म सञ्चालन हुने सम्मेलनमा देशभरका युवाहरूले जलवायु परिवर्तनका असर, न्यूनीकरण तथा अनुकूलनका उपायबारे बहस र पैरवी गर्नेछन् ।
