काठमाडाैँ । रोल्पामा अविरल वर्षापछि आएको पहिरोमा परी मृत्यु हुनेको संख्या सात पुगेको छ। थवाङ गाउँपालिका–५ कोटलबारामा गएराति आएको पहिरोमा परेर सात जनाको मृत्यु भएको हो भने पाँच जना अझै बेपत्ता छन्।
सशस्त्र प्रहरीका डीएसपी शैलेन्द्र थापाका अनुसार पहिरोमा परी मृत्यु हुनेमा १८ वर्षीया शान्ति पुन मगर, ६५ वर्षीय कमलबहादुर पुन मगर, ४० वर्षीया जुनकुमारी पुन मगर, ९ वर्षीय अशिम पुन मगर, ६ वर्षीय अशोक पुन मगर, ७५ वर्षीय दलबहादुर पुन मगर र ७१ वर्षीया मनरखी पुन मगर रहेका छन्।
पहिरोमा परेर २२ वर्षीय हिमाल पुन मगर र २५ वर्षीय संजय घर्तीमगर घाइते भएका छन्। उनीहरूलाई थवाङ स्वास्थ्य चौकीमा प्रारम्भिक उपचारपछि थप उपचारका लागि बुटवल पठाइएको छ।
मृतकमध्ये एक महिला र दुई पुरुषको शव प्यूठानको स्वर्गद्वारी नगरपालिका र माण्डवी गाउँपालिका क्षेत्रमा पर्ने माडी खोलाको किनारबाट फेला परेको प्रहरीले जनाएको छ।
पहिरोमा परी ८० वर्षीय अजम्बर पुन मगर, ७८ वर्षीय बलबहादुर पुन मगर, ७२ वर्षीय लिलबहादुर पुन मगर, ७१ वर्षीया मनि पुन मगर र ६७ वर्षीया हस्तकला पुन मगर बेपत्ता छन्।
बेपत्ताको खोजी तथा उद्धारका लागि नेपाली सेना, सशस्त्र प्रहरी र नेपाल प्रहरीको संयुक्त टोली परिचालन गरिएको छ। लगातार वर्षा भइरहेकाले लेदोसहित पहिरो खस्ने क्रम नरोकिँदा उद्धार तथा खोजी कार्यमा कठिनाइ भइरहेको डीएसपी थापाले बताए।
