काठमाडौं । नेपाली कांग्रेसका निवर्तमान सभापति एवं पूर्वप्रधानमन्त्री शेरबहादुर देउवाले आफूविरुद्ध भइरहेका कानुनी कारबाही र राजनीतिक षड्यन्त्रबाट आफू नडराउने बताएका छन् ।
बिहीबार नेपाल फर्किएका देउवाले विमानस्थलमा अपेक्षाकृत नरम धारणा राखे पनि संस्थापन इतर पक्षको चुनदेवीस्थित सम्पर्क कार्यालय पुगेर नेता–कार्यकर्तालाई सम्बोधन गर्ने क्रममा भने आक्रामक अभिव्यक्ति दिएका हुन् ।
देउवाले आफू र पत्नी आरजु राणा देउवाविरुद्ध विभिन्न निकायमा मुद्दा तथा अनुसन्धान अघि बढाइएको भन्दै त्यसबाट आफू विचलित नहुने स्पष्ट पारे । आफूहरूविरुद्ध अन्तर्राष्ट्रिय स्तरमै मुद्दा अघि बढाउने प्रयास भए पनि त्यसले कुनै परिणाम नदिएको उनको दाबी थियो ।
नेपालमै समेत आफूहरूमाथि मुद्दा चलाइएको उल्लेख गर्दै देउवाले अदालतले पक्राउ नगर्न आदेश दिँदासमेत आफूहरूमाथि ‘बदमासी’ गरिएको आरोप लगाए ।
उनले सम्पत्ति शुद्धीकरण अनुसन्धान विभागले आफूहरूमाथि पटकपटक अनुसन्धान गरे पनि कुनै तथ्य फेला नपरेको दाबी गरे । अनुसन्धानका नाममा आफूलाई दुःख दिने प्रयास भए पनि त्यसलाई लिएर आफूले बदलाको भावना नराख्ने उनको भनाइ थियो ।
देउवाले पूर्वराजा ज्ञानेन्द्र शाहले समेत आफूलाई केही गर्न नसकेको भन्दै अहिले आफूविरुद्ध लाग्नेहरूले पनि केही गर्न नसक्ने टिप्पणी गरे ।
‘राजा ज्ञानेन्द्रले त सकेनन्, अरूले सक्लान् यहाँ ?’ भन्दै उनले आफूविरुद्ध भइरहेका गतिविधिको जवाफ समयले नै दिने बताए ।
उनले नेपालमा गणतन्त्र आफ्नो व्यक्तिगत चाहनाका कारण नआएको भन्दै संविधानसभाको निर्णय र नेपाली जनताको चाहनाबाट गणतन्त्र स्थापना भएको बताए । आफूले चाहेर मात्रै गणतन्त्र आउन वा हट्न नसक्ने उनको भनाइ थियो ।
‘नेपाली जनता सबैभन्दा ठूलो हो, जनता मालिक हो । मालिकले जे भन्यो त्यही हुन्छ,’ देउवाले भने ।
आफू धेरै विषयमा प्रतिक्रिया दिइरहन नचाहेको उल्लेख गर्दै उनले देशको अदालत र जनताले सबै कुरा बुझेको दाबी गरे । आफूविरुद्ध भइरहेका गतिविधिबारे अन्ततः समयले नै फैसला गर्ने उनको भनाइ थियो ।
