काठमाडाैँ । नेपाली कांग्रेसका पूर्वकार्यवाहक सभापति पूर्णबहादुर खड्का ललितपुरको बाडेगाउँस्थित पार्टीका सन्त नेता कृष्णप्रसाद भट्टराई (किशुनजी) को आश्रममा पुगेका छन्।
२४ भदौमा भएको घटनाको चौथो दिन आश्रमको निरीक्षण गरेका खड्का आइतबार बिहान पुनः बाडेगाउँ पुगेका हुन्। दोस्रोपटक आश्रम पुगेका उनले पार्टीभित्रको एकता र सहकार्यलाई बलियो बनाउने उद्देश्यले आफू बाडेगाउँ आएको बताएका छन्।
खड्काले किशुनजीको आश्रमबाटै नेपाली कांग्रेसको सम्पूर्ण एकताको संकल्प गर्ने बताए। पछिल्लो राजनीतिक परिस्थितिमा पार्टीभित्र एकताको आवश्यकता बढेको भन्दै उनले कांग्रेसलाई थप सुदृढ बनाएर अघि बढाउनुपर्नेमा जोड दिएका छन्।
खड्कासँगै संस्थापन इतर समूहका नेता तथा कार्यकर्तासमेत बाडेगाउँ पुगेका थिए। आश्रममा उनीहरूले पार्टीको आगामी दिशा, आन्तरिक एकता र समसामयिक राजनीतिक विषयमा छलफलसमेत गरेका छन्।
