काठमाडौं । राष्ट्रिय प्रजातन्त्र पार्टी (राप्रपा)की प्रमुख सचेतक खुश्बु ओलीले अनसनरत इन्टर्न चिकित्सक डा. डिल्ली हरिजनको माग तत्काल सम्बोधन गर्न सरकारको ध्यानाकर्षण गराएकी छन्।
प्रतिनिधिसभाको शुक्रबारको बैठकमा बोल्दै प्रमुख सचेतक ओलीले वीर अस्पतालको सघन उपचार कक्ष (आईसीयू)मा उपचाररत डा. हरिजनको जीवनरक्षाका लागि सरकारलाई संवेदनशील बन्न आग्रह गरिन्।
उनले इन्टर्न चिकित्सकहरूलाई स्वास्थ्य सेवाको आठौँ तहको प्रारम्भिक तलबमानको ५० प्रतिशत बराबर निर्वाह भत्ता सबै सार्वजनिक तथा निजी शिक्षण संस्थाले अनिवार्य रूपमा उपलब्ध गराउनुपर्ने माग गरिन्। साथै, श्रम ऐनमा व्यवस्था भएअनुसार कार्यघण्टासम्बन्धी प्रावधान पूर्ण रूपमा कार्यान्वयन गर्नुपर्नेमा जोड दिइन्।
संसद्मा उनले भनिन्, “अहिले वीर अस्पतालको आईसीयूमा एमबीबीएस तथा बीडीएस इन्टर्नका आन्दोलनरत डा. डिल्ली हरिजन हुनुहुन्छ। माइतीघर मण्डलामा अनसन बसेका उहाँ अहिले आईसीयूमा हुनुहुन्छ। उहाँहरूको मुख्य माग इन्टर्न चिकित्सकलाई पनि समान पारिश्रमिक उपलब्ध गराइयोस् भन्ने हो। चिकित्सकहरूको मासिक निर्वाह भत्तासम्बन्धी प्रतिवेदन कार्यान्वयन होस् र श्रम ऐनअनुसारको कार्यघण्टा लागू गरियोस् भन्ने माग लिएर उहाँहरू आन्दोलनमा हुनुहुन्छ। यी माग तत्काल सम्बोधन गर्न म स्वास्थ्य मन्त्रालय र प्रधानमन्त्रीको ध्यानाकर्षण गराउन चाहन्छु। उहाँको स्वास्थ्य अवस्था गम्भीर रहेकाले सदनमा रहेका चिकित्सकहरूको समेत यसतर्फ ध्यान जान आवश्यक छ।”
प्रमुख सचेतक ओलीले प्रधानमन्त्री बालेन्द्र शाहले सीमासम्बन्धी विषयमा दिएको विवादास्पद अभिव्यक्ति संसद्को अभिलेखबाट हटाउन पनि सभामुखको ध्यानाकर्षण गराइन्।
