काठमाडौं । नागरिक लगानी कोषको रिक्त कार्यकारी निर्देशक पदका लागि खुला प्रतिस्पर्धाबाट पदपूर्ति गर्ने प्रक्रियाअन्तर्गत पाँच जना उम्मेदवार अन्तर्वार्ता र व्यावसायिक कार्ययोजना प्रस्तुतिकरणका लागि छनोट भएका छन्।
अर्थ मन्त्रालयअन्तर्गतको नागरिक लगानी कोषको कार्यकारी निर्देशक छनोट तथा सिफारिस समितिले २०८३ साउन २१ गते बसेको बैठकको निर्णयअनुसार शैक्षिक योग्यता, कार्यानुभव तथा व्यावसायिक एवं वित्तीय कार्ययोजनाको मूल्याङ्कनका आधारमा उम्मेदवार छनोट गरेको हो।
छनोटमा परेका उम्मेदवारहरूमा अर्जुन कुमार गौतम, गोपाल घिमिरे, पर्वत कुमार कार्की, यज्ञ प्रकाश न्यौपाने र समता पन्त भट्ट रहेका छन्।
समितिले सार्वजनिक गरेको सूचनाअनुसार अर्जुन कुमार गौतम र गोपाल घिमिरेको अन्तर्वार्ता साउन २५ गते क्रमशः बिहान ७ बजे र बिहान ८ बजे हुनेछ। त्यस्तै पर्वत कुमार कार्की र यज्ञ प्रकाश न्यौपानेको अन्तर्वार्ता सोही दिन साँझ ५ बजे र साँझ ६ बजे तय गरिएको छ।
समता पन्त भट्टको व्यावसायिक कार्ययोजना प्रस्तुतिकरण तथा अन्तर्वार्ता साउन २६ गते बिहान ८ बजे हुने जनाइएको छ।
सबै उम्मेदवारको व्यावसायिक कार्ययोजना प्रस्तुतिकरण तथा अन्तर्वार्ता अर्थ मन्त्रालय, सिंहदरबारमा सञ्चालन हुने अर्थ मन्त्रालयले जनाएको छ।
