काठमाडौं । जय नेपाल पार्टीका अध्यक्ष डा. धवलशमशेर जबराले नवगठित ‘जय नेपाल पार्टी’ले हिन्दु अधिराज्य, संवैधानिक राजसंस्थाको पुनःस्थापना र लोकतान्त्रिक प्रणालीलाई मुख्य राजनीतिक एजेन्डाका रूपमा अघि बढाउने घोषणा गर्नुभएको छ।
बिहीबार काठमाडौंमा आयोजित पत्रकार सम्मेलनमा अध्यक्ष जबराले पार्टीले सक्रिय राजसंस्थाको अवधारणा नल्याएको स्पष्ट पार्दै अभिभावकीय, राष्ट्रिय एकता र राष्ट्ररक्षकको भूमिकामा रहने संवैधानिक राजसंस्थाको पुनःस्थापनाको पक्षमा रहेको बताउनुभयो।
उहाँले नेपालबाट हिन्दु राष्ट्रको व्यवस्था हटाउनु गलत निर्णय भएको दाबी गर्दै त्यसलाई शान्तिपूर्ण रूपमा सडक र संसदीय दुवै माध्यमबाट पुनःस्थापना गर्ने पार्टीको लक्ष्य रहेको उल्लेख गर्नुभयो। सनातन धर्मलाई आधार बनाए पनि किराँत, बौद्धलगायत सबै धर्मावलम्बीको सम्मान गर्ने नीति पार्टीले अवलम्बन गर्ने उहाँको भनाइ थियो।
अध्यक्ष जबराले पार्टीलाई युवा र महिला केन्द्रित बनाइने जानकारी दिँदै केन्द्रीय समितिको औसत उमेर ४५ वर्ष कायम गर्ने लक्ष्य राखिएको बताउनुभयो। जिल्ला र निर्वाचन क्षेत्रबाटै प्रतिनिधित्व सुनिश्चित गर्दै संगठन निर्माण गरिने तथा निर्णय प्रक्रिया सर्वसम्मति वा आवश्यक परे बहुमतका आधारमा सञ्चालन गरिने उहाँले बताउनुभयो।
उहाँले नेतृत्वले निर्णय लाद्ने प्रवृत्तिको अन्त्य गर्दै सामूहिक नेतृत्व र आन्तरिक लोकतन्त्रलाई प्राथमिकता दिने दाबी गर्नुभयो। पार्टी कुनै एक व्यक्तिको नभई सबै सदस्यको साझा राजनीतिक संगठन हुने उहाँको भनाइ थियो।
जबराले साउन २८ गते निर्वाचन आयोगमा पार्टी दर्ताका लागि निवेदन दिने जानकारी दिँदै पार्टीको नेतृत्व आफूले गर्ने र दुर्गा प्रसाईंलाई प्रमुख सर्वमान्य नेताका रूपमा अघि बढाइएको बताउनुभयो। पार्टीको चुनाव चिह्नबारे भने छलफल भइरहेको उहाँले जानकारी दिनुभयो।
उहाँले गाउँ तहसम्म संगठन विस्तार गरी आगामी स्थानीय तह निर्वाचनमा सहभागी हुने तयारीसमेत पार्टीले गरिरहेको बताउनुभयो।
