काठमाडौं । उद्योग, वाणिज्य तथा आपूर्तिमन्त्री गौरीकुमारी यादवको निर्देशनपछि औद्योगिक क्षेत्रभित्र सम्झौता कार्यान्वयनमा कडाइ सुरु भएको छ। यसैक्रममा औद्योगिक क्षेत्र व्यवस्थापन लिमिटेडको बालाजु शाखा कार्यालयले सम्झौताविपरीत गतिविधि गरेको भन्दै कन्टिनेन्टल कम्पोनेन्ट सर्भिसेस प्रालिलाई सात दिनभित्र छलफलमा उपस्थित हुन पत्राचार गरेको छ।
बालाजु शाखाले उद्योगलाई पठाएको पत्रमा उद्योग र कार्यालयबीच भएको सम्झौताका विभिन्न सर्त पालना नभएको उल्लेख गर्दै सम्झौतामा उल्लेखित उद्देश्यअनुसार उद्योग सञ्चालन गर्न आग्रह गरिएको छ। कार्यालयले यसअघि पनि पटक–पटक मौखिक तथा लिखित रूपमा सम्झौताअनुसार काम गर्न जानकारी गराउँदै आएको जनाएको छ।
कार्यालयका अनुसार उद्योगका प्रतिनिधिले पत्र बुझ्न अस्वीकार गरेपछि उक्त पत्र उद्योगको मुख्य गेटमा टाँस गरी मुचुल्कासमेत गरिएको छ।
पत्रअनुसार सम्बन्धित उद्योगलाई गाडी मर्मत तथा सर्भिसिङसम्बन्धी उद्योग सञ्चालनका लागि जग्गा उपलब्ध गराइएको भए पनि सम्झौताविपरीत अन्य गतिविधि भएको पाइएको छ। उद्योगको दर्ता प्रमाणपत्रमा समेत सवारीसाधन मर्मत तथा सर्भिसिङ गर्ने उद्देश्य उल्लेख भए पनि सोहीअनुसार उद्योग सञ्चालन नभएको कार्यालयको दाबी छ।
यसअघि कार्यालयले सम्झौताका सर्तअनुसार उद्योग सञ्चालन गर्न समयसीमासहित निर्देशन दिएको थियो। तोकिएको अवधिभित्र सम्झौताअनुसार काम नभए सम्झौता रद्द गर्ने चेतावनीसमेत दिइएको थियो।
निर्देशनको पालना नभएपछि कार्यालयले उद्योगलाई उपलब्ध गराउँदै आएको विद्युत् तथा खानेपानी सेवा पनि विच्छेद गरेको जनाएको छ। सेवा विच्छेदका कारण उत्पादन प्रभावित भएको भन्दै उद्योगले असहमति जनाए पनि सम्झौतामा उत्पन्न विवाद आपसी छलफलबाट समाधान गर्ने व्यवस्था रहेको कार्यालयले स्पष्ट पारेको छ।
उद्योगमन्त्री गौरीकुमारी यादवको निर्देशनपछि औद्योगिक क्षेत्रभित्र रहेका उद्योगहरूले सम्झौतामा उल्लेखित उद्देश्यअनुसार नै व्यवसाय सञ्चालन गर्नुपर्ने र सर्त उल्लंघन गर्ने उद्योगमाथि आवश्यक प्रशासनिक तथा कानुनी प्रक्रिया अघि बढाइने नीति कार्यान्वयनमा ल्याइएको जनाइएको छ।
बालाजु शाखा कार्यालयले पछिल्लो पत्रमार्फत सात दिनभित्र छलफलमा उपस्थित भई सम्झौताअनुसार उद्योग सञ्चालनबारे स्पष्ट पार्न आग्रह गरेको छ। पत्र बुझ्न अस्वीकार गरेपछि गेटमै सूचना टाँस गरी मुचुल्का गरिएको घटनालाई औद्योगिक क्षेत्र व्यवस्थापनले सम्झौता कार्यान्वयनमा थप कडाइ गर्ने संकेतका रूपमा हेरिएको छ।
