काठमाडाैँ । राष्ट्रिय स्वतन्त्र पार्टीकी सांसद नीतिमा भण्डारीले देशभर कायम रहेको रासायनिक मलको अभाव र वितरण प्रणालीको समस्या समाधानका लागि सरकारको ध्यानाकर्षण गराउनुभएको छ ।
मंगलवार बसेको प्रतिनिधि सभाको बैठकमा बोल्दै सांसद भण्डारीले किसानहरूले भोग्दै आएको मलको समस्या समाधानका लागि तीन बुँदे ठोस सुझाव प्रश्तुत गर्नुभयो । आफ्नो निर्वाचन क्षेत्रका पाँचवटै पालिकामा हालै सम्पन्न सार्वजनिक सुनुवाईका क्रममा किसानले मागअनुसार मल नपाएको र वितरण प्रणाली प्रभावकारी नभएको गुनासो गरेको उहाँले सदनलाई जानकारी गराउनु भयो ।
मल अभावको दीर्घकालीन समाधानका लागि उहाँले वडा तहबाट खेतीयोग्य क्षेत्रफलका आधारमा ‘किसान परिचयपत्र’ बनाएर मात्र मल वितरण गर्ने सबल प्रणाली विकास गर्न र उक्त प्रणालीलाई डिजिटल प्रणालीमा रूपान्तरण गर्न माग गर्नुभयो । यसैगरी, सरकारले मूल्य र गुणस्तर निर्धारण गरी कडा नियमनसहित निजी क्षेत्रलाई पनि मल आयातको अनुमति दिनुपर्ने उहाँको प्रश्ताव छ । किसानले निजी क्षेत्रबाट खरिद गरेको बिलका आधारमा अनुदान रकम फिर्ता पाउने वा खरिदकै समयमा बिलमै समायोजन गर्ने व्यवस्था मिलाउन पनि उहाँले सरकारलाई सुझाव दिनुभयो ।
उहाँले किसानले निजी क्षेत्रबाट मल खरिद गरेमा किसानकार्ड र खरिद बिलका आधारमा अनलाइन प्रणालीमार्फत अनुदान उपलब्ध गराउने व्यवस्था गर्नुपर्नेमा जोड दिनुभयो ।
