काठमाडौं । उद्योग, वाणिज्य तथा आपूर्ति मन्त्रालयका सचिव नारायणप्रसाद शर्मा दुवाडीले नेपालमा ग्यासको परिमाणमा अभाव नभए पनि वितरण प्रणालीमा देखिएको समस्याका कारण बजारमा अभाव देखिएको बताउनुभएको छ ।
मंगलबार उद्योग तथा वाणिज्य र श्रम तथा उपभोक्ता हित समितिको बैठकमा ग्यास आपूर्ति व्यवस्थापनसम्बन्धी छलफलका क्रममा सचिव दुवाडीले यस्तो बताउनुभएको हो ।
उहाँका अनुसार आधा सिलिन्डर ग्यास वितरण गरिएका बेला धेरै उपभोक्ताले ग्यास नभराएकाले ठूलो संख्यामा सिलिन्डर रिफिल हुन सकेका थिएनन् । पूर्ण १४ किलोको सिलिन्डर वितरण सुरु भएपछि ती सिलिन्डर एकैपटक बजारमा आउँदा वितरण प्रणालीमा चाप परेको उहाँको भनाइ छ ।
पछिल्लो तीन महिनाको तथ्यांकअनुसार कम्तीमा ७० लाख सिलिन्डर बजारमा आउनुपर्नेमा ५४ लाख सिलिन्डर मात्रै रिफिल भएर वितरण भएको सचिव दुवाडीले जानकारी दिनुभयो । यस अवधिमा करिब २३ लाख सिलिन्डर रिफिल हुन नसकेको उहाँले बताउनुभयो ।
उहाँका अनुसार यसअघि मासिक ४६–४७ हजार मेट्रिक टनको हाराहारीमा रहेको ग्यासको माग अहिले बढेर करिब ६० हजार मेट्रिक टन पुगेको छ । आधा सिलिन्डरबाट पूर्ण सिलिन्डर वितरणमा फर्किएपछि एकैपटक ठूलो संख्यामा सिलिन्डर बजारमा आउँदा माग अस्वाभाविक रूपमा बढेको उहाँको दाबी छ ।
सचिव दुवाडीले ग्यासको थप आपूर्तिका लागि इन्डियन आयल कर्पोरेसनसँग कम्तीमा एकदेखि डेढ महिनाका लागि अतिरिक्त ग्यास उपलब्ध गराउन आग्रह गरिएको जानकारी दिनुभयो । हाल करिब ५० हजार मेट्रिक टन ग्यास आपूर्ति गर्ने व्यवस्था भएको र साउन १९ गतेसम्म ३१ हजार मेट्रिक टन ग्यास नेपाल भित्रिसकेको उहाँले बताउनुभयो ।
उहाँले अहिलेको तथ्यांक हेर्दा ग्यासको परिमाण नै अत्यधिक अपर्याप्त रहेको भन्दा पनि बजारभित्रको आपूर्ति र वितरण प्रणालीलाई व्यवस्थित गर्नुपर्ने अवस्था देखिएको बताउनुभयो ।
सचिव दुवाडीका अनुसार ४१ जिल्लामा ग्यासको समस्या धेरै नरहेको भए पनि २८ जिल्लामा केही समस्या देखिएको छ । करिब आठ जिल्लामा भने विशेष व्यवस्थापन र निगरानी आवश्यक रहेको उहाँले जानकारी दिनुभयो ।
उहाँले ग्यासको आपूर्ति र बजारभित्रको सिलिन्डरको सर्कुलेसनलाई प्रभावकारी बनाउन आवश्यक रहेको बताउनुभयो ।
