काठमाडौं । बजारमा नक्कली उत्पादनको बिक्री–वितरण भइरहेको खबर सार्वजनिक भएपछि उद्योग, वाणिज्य तथा आपूर्ति मन्त्री गौरी यादवले त्यस्ता उत्पादनको बिक्री–वितरण तत्काल रोक्न वाणिज्य, आपूर्ति तथा उपभोक्ता संरक्षण विभागलाई निर्देशन दिनुभएको छ।
मन्त्री यादवको निर्देशनपछि विभागले बजार अनुगमनलाई तीव्र बनाउँदै सयभन्दा बढी शंकास्पद नक्कली उत्पादन नियन्त्रणमा लिएको छ। नियन्त्रणमा लिइएका ती उत्पादनको गुणस्तर तथा मौलिकता परीक्षणका लागि प्रयोगशालामा पठाइएको विभागले जनाएको छ।
मन्त्री यादवले नक्कली उत्पादनको कारोबार उपभोक्ताको स्वास्थ्य र अधिकारसँग प्रत्यक्ष जोडिएको विषय भएकाले यसमा कुनै पनि प्रकारको लापरबाही सह्य नहुने बताउनुभएको छ। उहाँले बजार अनुगमनलाई थप प्रभावकारी बनाउन र दोषी पाइए कानुनबमोजिम कडा कारबाही गर्न विभागलाई निर्देशन दिनुभएको छ।
वाणिज्य, आपूर्ति तथा उपभोक्ता संरक्षण विभागका महानिर्देशक मोति सापकोटाले बजारमा अझै पनि केही नक्कली उत्पादन बिक्री–वितरण भइरहेको सूचना प्राप्त भइरहेकाले विभागले नियमित रूपमा बजार अनुगमन गरिरहेको बताउनुभएको छ।
उहाँका अनुसार नियन्त्रणमा लिइएका उत्पादनको प्रयोगशाला परीक्षण भइरहेको छ। परीक्षण प्रतिवेदनका आधारमा सम्बन्धित उत्पादन तथा व्यवसायीमाथि आवश्यक कानुनी प्रक्रिया अघि बढाइनेछ।
विभागले शंकास्पद वा नक्कली उत्पादन बिक्री–वितरण भइरहेको पाइएमा सम्बन्धित निकायलाई जानकारी गराउन उपभोक्तासँग आग्रह गरेको छ।
मन्त्री यादवले उपभोक्ताको स्वास्थ्यमा खेलवाड गर्ने तथा बजारमा नक्कली उत्पादन बिक्री–वितरण गर्ने जो–कोहीलाई कानुनबमोजिम कारबाही गरिने स्पष्ट पार्दै बजारलाई स्वच्छ, सुरक्षित र व्यवस्थित बनाउन सरकार प्रतिबद्ध रहेको बताउनुभएको छ।
