काठमाडौँ । नेपाली काँग्रेसका सहमहामन्त्री डा.प्रकाशशरण महतले संविधान एक गतिशील दस्ताबेज भएकोले यसलाई समयानुकुल परिवर्तन गर्दै लान सकिने बताएका छन् ।
संविधान दिवसका अवसरमा काठमाडौँ क्षेत्र नं ५ द्धारा आयोजित एक कार्यक्रमलाई सम्बोधन गर्दै उनले भने– संविधानमा सबैले भनेका सबै कुरा नसमेटिएको कुरा सत्य हो, तर यो एक गतिशील दस्ताबेज भएकोले समयक्रममा हाम्रो उपस्थिति र आवश्यकता अनुसार परिवर्तन गर्दै लैजानुपर्छ ।
डा.महतले भने– यो संविधानमा हामीले भनेका पनि सबै कुरा समेटिन सकेका छैनन् र कम्युनिष्टहरुको चाहना अनुसार पनि नआएको साँचो हो जस्तो कि हामीले धार्मिक स्वतन्त्रताको कुरा गरेका थियौँ र कम्युनिष्टहरुको चाहना भने एक दलीय व्यवस्था राख्ने भन्ने थियो ।
वर्तमान संविधानको मस्यौदा समितिका सदस्य रहेका डा. महतले त्यस समयको अनुभव सुनाउँदै संविधानमा राख्नुपर्ने विषयमा धेरै विवाद भएको र दोस्रो संविधान सभाले पनि संविधान जारी गर्न नसक्दा राजनीतिक दलमाथि नै प्रश्न उठ्ने भएकाले संविधान नै जारी नहुनुभन्दा प्राप्त उपलब्धिहरुलाई समेट्दै जाउँ भन्ने उद्देश्यले नै संधिवान घोषणा गरिएको बताए ।
यो संविधान नेपाली काँग्रेस नेतृत्वको सरकारले गरेको स्मरण गर्दै डा.महतले आगामी दिनहरुमा काँग्रेसको शक्ति र उपस्थिति बढ्दै गयो भने प्रजातन्त्र र नेपाली जनताको चाहना अनुकुल संविधानमा संशोधन गर्दै लगिने पनि उनले बताए ।
सहमहामन्त्री डा.महतले यो संविधानलाई सबै नेपालीको साझा दस्ताबेज बनाउनुपर्ने बताए । सरकारले सुशासन दिन नसक्ने र अहिलेकोजस्तो अधिनायकवादी शैलीलाई नै कायम गर्दै लाने हो भने यसले सरकारप्रति मात्र नभएर देशको साझा दस्ताबेज बन्नुपर्ने संविधानप्रति नै वितृष्णा बढाउने खतरा रहने उनले बताए ।
