काठमाडाैँ । नेपाल–भारत पारवहन सम्झौताअन्तर्गत तेस्रो मुलुकबाट आयात हुने मालसामान ढुवानीका लागि कोलकाता–विराटनगर रेल्वे कार्गो सेवा औपचारिक रूपमा सञ्चालनमा आएको छ ।
परराष्ट्र मन्त्रालयकाअनुसार २०८३ साउन १ गतेदेखि उक्त मार्गबाट कार्गो ढुवानीको कार्य शुरु भएको हो । मन्त्रालयमा आयोजित नियमित पत्रकार सम्मेलनका क्रममा प्रवक्ता एवं सहसचिव लोकबहादुर पौडेल क्षेत्रीले यस सेवाको शुरुवातसँगै नेपालको वैदेशिक व्यापारमा सकारात्मक प्रभाव पर्ने विश्वास व्यक्त गर्नुभयो ।
रेल्वे कार्गो सञ्चालनमा आएसँगै व्यापार लागत घट्ने, ढुवानी प्रक्रिया थप सुरक्षित र भरपर्दो हुने तथा आयातित वस्तुहरू कम समयमै गन्तव्यसम्म आइपुग्ने उहाँले जानकारी दिनुभयो । यसअघि सडक मार्गबाट ढुवानी गर्दा नेपाली आयातकर्ताहरूले व्यहोर्नुपरेको विलम्ब शुल्क, कन्टेनर डिटेन्सन चार्ज र सडक ढुवानीको अतिरिक्त भार अब उल्लेख्य रूपमा कम हुने मन्त्रालयको ठहर छ । यस प्रक्रियाले समग्र व्यापार पारवहन लागत न्युनिकरण गर्दै व्यापार सहजीकरणमा ठोस मद्दत पुग्ने प्रवक्ता क्षेत्रीले बताउनु भयो ।
उहाँले भन्नुभयो, ‘नेपाल–भारत पारवहन सम्झौताअन्तर्गत तेस्रो मुलुकबाट आयात हुने मालसामान भारतीय भूमि हुँदै नेपालको सीमासम्म ढुवानी गर्ने उद्देश्यले कोलकाता–विराटनगर रेलवे कार्गो सेवा २०८३ साउन १ गतेदेखि सञ्चालनमा आएको छ । यस सेवा सञ्चालनमा आएपछि व्यापार लागत घट्ने, ढुवानी थप सुरक्षित, भरपर्दो र छिटो हुने अपेक्षा गरिएको छ । साथै, ढुवानीका क्रममा नेपाली आयातकर्ताले बेहोर्दै आएको विलम्ब शुल्क,कन्टेनर डिटेन्सन शुल्क तथा सडक ढुवानीसम्बन्धी अतिरिक्त खर्चमा कमी आउनेछ । यसबाट समग्र व्यापार तथा पारवहन लागत उल्लेखनीय रूपमा न्यूनीकरण भई व्यापार सहजीकरणमा टेवा पुग्ने र नेपाली उद्योगीहरूको प्रतिष्पर्धात्मक क्षमता थप सुदृढ हुने विश्वास गरिएको छ ।
ढुवानी सेवामा हुने सुधारले नेपाली उद्योगीहरूको प्रतिष्पर्धात्मक क्षमतालाई थप मजबुत बनाउन सहयोग पुग्ने अपेक्षा समेत परराष्ट्र मन्त्रालयले लिएको छ ।
